Ómir boıǵy jaza ózgerissiz qala ma: Nuraıdyń otbasy Aımahannyń apellıatsııasyna qarsylyq bildirdi

Jábirlenýshi taraptyń advokattary Aıanhan Omarov pen Muhammedjan Ahmetov daıyndaǵan qarsylyq ýájinde úkimniń zańdy ári negizdi ekeni kórsetilgen.

Advokattar Aımahandy nekege turýǵa májbúrleý baby boıynsha aqtaýǵa jáne adam óltirýdi asa qatygezdikpen jasalǵan qylmys retinde saralaýdy alyp tastap, QK-niń 99-babynyń 1-bóligine qaıta saralaýǵa qarsy.

Nuraıdyń otbasy úkimniń azamattyq talapqa qatysty bóligine ǵana shaǵymdandy. Týystary sot belgilegen 25 mln teńgeniń ornyna bastapqyda talap etilgen 10 mlrd teńge moraldyq zııan ótemaqysyn óndirip berýdi suraıdy.

Qylmystyq is Shymkent qalalyq sotynyń apellıatsııalyq alqasyna kelip tústi. Іs 22 tomnan turady. Materıaldarmen birge 39 DVD-dısk, úkimniń kóshirmesi jáne apellıatsııalyq shaǵymdar da tapsyrylǵan.

Burynǵy qarym-qatynas nekege kelisimdi bildirmeıdi

Aımahannyń qorǵaýshylary 2025 jylǵy qazan aıyndaǵy oqıǵalarǵa deıin onyń Nuraımen shamamen úsh aı kezdeskenin alǵa tartady. Qorǵaý tarapynyń nusqasy boıynsha, jastar bir-birine sezim bildirip, otbasy qurýdy talqylaǵan. Olar qyzdyń Shymkentke óz erkimen kelgenin Aımahannyń ata-anasynyń úıindegi beınejazbalarmen, Nuraıdyń óz qolymen jazǵan jazbasymen jáne onyń polıtsııaǵa bergen túsiniktemesimen dáleldeýge tyrysqan.

Nuraıdyń otbasy jastar arasynda buryn qarym-qatynas bolǵanyn joqqa shyǵarmaıdy. Alaıda jábirlenýshi taraptyń pikirinshe, burynǵy qarym-qatynas adamnyń keıin nekege turýǵa mindetti túrde kelisetinin bildirmeıdi.

— Burynǵy romantıkalyq qarym-qatynastyń bolýy adamnyń kez kelgen jaǵdaıda jáne kez kelgen ýaqytta nekege turýǵa kelisýi mindetti ekenin bildirmeıdi. Nekege turý týraly sheshim naqty ári erikti túrde qabyldanýy tıis, — dep kórsetilgen jábirlenýshi taraptyń ýájinde.

Advokattar qujatta sot anyqtaǵan mán-jaılardy keltiredi. 2025 jylǵy 4 qazanda Aımahan Nuraıdy Almatydan Shymkentke alyp ketken.

Qyz ózin qaladan tys jerge alyp bara jatqanyn túsingen kezde, Aımahan qarsylyq kórsetken jaǵdaıda ekeýi de jol apatynan qaza bolatynyn aıtyp qorqytqan. Osydan keıin ol Nuraıdyń telefonyn tartyp alyp, Shymkenttegi úıine jetkizgen jáne Nuraıdyń qarsylyǵyna qaramastan úıge kirgizgen.

Osy epızodta dene jaraqattarynyń bolmaýy qorǵaý tarapynyń negizgi ýájderiniń biri bolǵan. Nuraıdyń otbasy ókilderi QK-niń 125-1-babynyń 1-bóligi (Nekege turýǵa májbúrleý) kúsh qoldanamyn dep qorqytý arqyly nekege májbúrleý úshin jaýapkershilik qarastyratynyn atap kórsetedi. Mundaı jaǵdaıda naqty dene jaraqatyn salý mindetti shart bolyp sanalmaıdy.

Advokattar óz ustanymyn Nuraıdyń keıingi áreketterimen de negizdeıdi. 5 qazanda saǵat 21:57–de ol anasyna bolǵan jaǵdaıdyń óz kelisiminsiz jasalǵanyn jáne muny qalamaıtynyn jazǵan. Kelesi kúni boıjetken Qarataý aýdandyq polıtsııa basqarmasyna júgingen. Nuraı aryzynda Aımahannyń ózin otbasyn qurý maqsatynda erkinen tys alyp kelgenin jáne telefonyn tartyp alǵanyn kórsetken.

Nuraıdyń óz erkimen kelgeni týraly jazbasyn jáne polıtsııadaǵy beınejazbany sot ta zerttegen. Saraptama qoljazba mátinniń Nuraıǵa tıesili ekenin rastaǵan.  Alaıda jábirlenýshi taraptyń advokattary mátinniń Nuraıǵa tıesili bolýy onyń sol sáttegi psıhologııalyq jaǵdaıyn nemese syrtqy faktorlardyń áserin anyqtaýǵa múmkindik bermeıtinin atap ótken.

Advokattar qorǵaý tarapy silteme jasaǵan dástúrli rásimderge de toqtalǵan. Jábirlenýshi taraptyń pikirinshe, Nuraıdyń bul rásimderge qatysýy oǵan deıin bolǵan qorqytý men qysymdy joqqa shyǵarmaıdy.

— Eshqandaı dástúr adamnyń erkine qarsy jasalǵan áreketterdi zańdy dep tanýǵa negiz bola almaıdy, — dep kórsetilgen qujatta.

Bir kúnde 76 qońyraý jáne Nuraıdy tanystary arqyly izdeý

Taǵy bir daý Nuraıdy ańdý týraly aıyp tóńireginde órbidi. Qorǵaý tarapy qylmys quramynyń bolmaǵanyn aıtyp, Nuraıdyń Aımahanǵa tikeleı «maǵan qońyraý shalma» dep aıtpaǵanyn alǵa tartady. Otbasy ókilderi óz qarsylyǵynda QK-niń 115-1-baby (Stalkıng) mundaı sózbe-sóz bas tartýdy talap etpeıtinin kórsetedi. Olardyń pikirinshe, adamnyń baılanys ornatqysy kelmeıtini onyń keıingi áreketterinen anyq kórinedi.

7 qazanda Aımahan Nuraıǵa 76 ret qońyraý shalǵan. 8 qazanǵa qaraǵan túni taǵy segiz ret telefon soǵyp, keıin birneshe saǵat boıy qyzdyń úıiniń aýlasynda kútken. 10-11 qazan aralyǵynda taǵy 70 qońyraý shalynǵan. Keıin Nuraı telefon nómirin aýystyrǵan.

Tikeleı baılanys úzilgennen keıin Aımahan onyń jańa nómirin kýrstastary arqyly izdeı bastaǵan. Іs materıaldarynda onyń N. N. Kýbashevaǵa, A. Satýovaǵa jáne D. Nurlanovaǵa Instagram jáne WhatsApp arqyly habarlasqany kórsetilgen. Ol ózin Nuraıdyń jigiti retinde tanystyryp, qyzdyń jańa nómirin berýdi suraǵan.

Advokattar Aımahannyń telefonynan alynǵan hat-habarlarǵa da silteme jasaıdy. 4-31 qazan aralyǵyndaǵy jazbalarda Nuraı turmysqa shyǵýǵa daıyn emes ekenin jáne ózine endi jaqyndamaýyn suraǵan. Al Aımahan óz jaýabynda óz áreketiniń durys bolmaǵanyn moıyndap, odan keshirim suraǵan.

Jábirlenýshi taraptyń pikirinshe, Nuraıǵa kóp ret qońyraý shalý, onyń úıiniń janynda kútý, telefon nómirin aýystyrýy jáne keıin ony tanystary arqyly izdeý áreketteri ańdýdyń turaqty sıpat alǵanyn kórsetedi.

Nuraıdyń otbasy qylmysty nege asa qatygezdikpen jasalǵan dep sanaıdy

Nuraıdyń otbasy ókilderi qorǵaý tarapynyń adam óltirýdi asa qatygezdikpen jasalǵan qylmys retinde saralaýǵa qatysty ýájderine egjeı-tegjeıli jaýap bergen. Aımahannyń advokattary adam óltirý faktisin daýlamaıdy. Olar onyń áreketin QK-niń 99-baby 2-bóliginiń 5-tarmaǵynan (asa qatygezdikpen jasalǵan adam óltirý) osy baptyń 1-bóligine (aýyrlatatyn mán-jaılarsyz adam óltirý) qaıta saralaýdy suraıdy. Bul bap boıynsha jaza jeńilirek.

Qorǵaý tarapy Joǵarǵy sottyń pyshaq jaraqattarynyń kóp bolýy ózdiginen asa qatygezdikti bildirmeıdi degen ustanymyna silteme jasaǵan.

Nuraıdyń otbasy ókilderi bul ustanymǵa qarsy emes. Alaıda olar istiń naqty mán-jaılary men kýáger paıda bolǵannan keıin Aımahannyń áreketterin de eskerý qajet dep sanaıdy.

Sot anyqtaǵandaı, Nuraıǵa 35 pyshaq jaraqaty salynǵan, onyń toǵyzy ishke ótken jaraqat bolǵan. Oqıǵaǵa Indıra Berkinbaeva kýá bolǵan. Áıeldi kórgen kezde Aımahan shabýylyn toqtatyp, birneshe metrge shegingen. Alaıda oqıǵa ornynan ketpegen. Aımahan Nuraıǵa qaıta oralyp, shabýylyn jalǵastyrǵan. Berkinbaeva onyń qyzdyń ish tusyna birneshe ret pyshaq suqqanyn kórgen.

Jábirlenýshi taraptyń advokattarynyń pikirinshe, bul epızod sottyń asa qatygezdik týraly qorytyndysy tek jaraqat sanyna negizdelmegenin kórsetedi. Alaıda Aımahan shabýyldy toqtatý múmkindigi bola tura, Nuraıǵa qaıta oralyp, shabýylyn jalǵastyrǵan.

Qorǵaý tarapy bul baǵalaýǵa qarsy. Apellıatsııalyq shaǵymda Aımahan qaıtyp kelgen kezde Nuraıdyń kóz jumǵan bolýy yqtımal ekeni, óıtkeni barlyq jaraqattyń qaı retpen salynǵanyn anyqtaý múmkin emes ekeni aıtylǵan.

Nuraıdyń otbasy ókilderi bul nusqany boljam dep sanaıdy jáne sot úkiminde keltirilgen sot-medıtsınalyq sarapshy Janbolat Pernebekovtiń kórsetýlerine silteme jasaıdy. Úkimde keltirilgen sot-medıtsınalyq sarapshynyń kórsetýlerine sáıkes, 35 jaraqattyń barlyǵy Nuraıǵa tiri kezinde salynǵan. Jaraqat alý kezinde qyz qatty qınalǵan. 

Saraptama affekt jaǵdaıyn rastamady

Sotta Aımahan adam óltirýdi qatty jan kúızelisi jaǵdaıynda jáne qajetti qorǵanys kezinde jasaǵanyn túsindirgen. 2026 jylǵy 12 mamyrdaǵy qosymsha keshendi sot-psıhologııalyq-psıhıatrııalyq saraptama fızıologııalyq affekt jaǵdaıyn anyqtamaǵan. 

Mamandar Aımahannyń sozylmaly psıhıkalyq aýrýdan zardap shekpegenin, óz áreketteriniń sıpaty men qoǵamdyq qaýiptiligin túsinýge jáne olardy basqarýǵa qabiletti bolǵanyn anyqtaǵan. 

Aımahannyń ózinen de dene jaraqattary tabylǵan. Saraptama olardy densaýlyqqa jeńil zııan retinde baǵalaǵan. Nuraıdyń otbasy ókilderi bul jaraqattardyń bolýy qajetti qorǵanysty dáleldemeıtinin aıtady. Olardyń pikirinshe, is materıaldarynda Aımahannyń ómirine nemese densaýlyǵyna naqty ári tikeleı qaýip tóngenin rastaıtyn dálelder joq.

25 mln teńgeniń ornyna — 10 mlrd teńge

Nuraıdyń otbasy úkimniń moraldyq zııandy óteý bóligin daýlap otyr. Sot protsesi kezinde onyń ákesi Baýyrjan Saǵynbek 10 mlrd teńge óndirip berýdi talap etken. Sot oǵan 25 mln teńge moraldyq zııan ótemaqysyn jáne advokat qyzmetine jumsalǵan 5 mln teńge shyǵyndy óteýdi belgilegen.

Jábirlenýshi taraptyń ókilderi moraldyq zııan úshin ótemaqy mólsherin bastapqyda talap etilgen 10 mlrd teńgege deıin ulǵaıtýdy suraıdy. Shaǵymda sot moraldyq zııan mólsherin ne sebepti dál 25 mln teńge dep belgilegenin túsindirmegeni kórsetilgen. Sot belgilegen 25 mln teńge talap etilgen 10 mlrd teńgeniń shamamen 0,25 paıyzyn ǵana quraıdy.

Advokattar talap etilgen somanyń sot úshin mindetti túrde tolyq kólemde qanaǵattandyrylýǵa tıis emes ekenin moıyndaıdy. Alaıda talap etilgen somany munshalyqty azaıtý naqty ári nanymdy negizdemeni qajet etedi.

Otbasy ókilderi Baýyrjan Saǵynbektiń basynan ótkergen aýyr kúızelisin jáne qyzynyń ólimine deıingi barlyq jaǵdaıdy eskerýdi suraıdy. Shaǵymda ákesiniń Nuraıdy qorǵaýǵa jasaǵan áreketteri, polıtsııaǵa júginýleri, nekege májbúrleý jáne qyzdy keıinnen ańdý faktileri atalady.

Advokattar 10 mlrd teńge talap etý Nuraıdyń ómirine aqshalaı baǵa qoıý nemese otbasynyń qaıǵysyn kommertsııalyq baǵalaý nysanyna aınaldyrý áreketi emes ekenin jeke atap ótken. Olar ótemaqyny zańda kózdelgen jaqyndaryna keltirilgen moraldyq zııannyń ornyn toltyrý tásili retinde qarastyrady.

Buǵan deıin Nuraıdyń otbasy 10 mlrd teńge kólemindegi moraldyq zııan ótemaqysy óndirilse, onyń barlyǵyn qaıyrymdylyqqa jumsaıtynyn málimdegen. 

Apellıatsııa qashan qaralady

Eske sala keteıik, Nuraı Serikbaı 2026 jylǵy 11 qańtarda Shymkentte qaza tapty. 

Onyń óliminen keıin Ulttyq quryltaıǵa 130-dan astam ótinish túsken. Prezıdent Qasym-Jomart Toqaev Shymkent polıtsııasynyń áreketterine quqyqtyq baǵa berýdi ІІM-ge tapsyrdy.

Qalalyq departament bastyǵy men onyń birinshi orynbasary qyzmetinen bosatylyp, birneshe qyzmetker jumystan shyǵaryldy.

ІІM Nuraıdyń otbasynyń ótinishterin qaraǵan polıtsııa qyzmetkerleriniń yqtımal salǵyrttyǵy faktisi boıynsha jeke qylmystyq is qozǵady.

Keıin Nuraıdyń 2025 jyldyń kúzinde bergen aryzymen jumys istegen Qarataý aýdandyq polıtsııa basqarmasynyń burynǵy tergeýshisi Ábilǵazy Artyqbaıǵa qatysty qylmystyq is qozǵaldy.

13 tamyzda Shymkenttiń qylmystyq ister jónindegi mamandandyrylǵan aýdanaralyq soty Sherhan Aımahandy nekege turýǵa májbúrleý, stalkıng jáne asa qatygezdikpen adam óltirý boıynsha kináli dep tanydy. Qylmystardyń jıyntyǵy boıynsha oǵan ómir boıyna bas bostandyǵynan aıyrý jazasy taǵaıyndaldy.

27 tamyzda Aımahannyń qorǵaýshylary apellıatsııalyq shaǵym berdi. 

Advokattar ony nekege májbúrleý boıynsha aqtaýdy, adam óltirýdi asa qatygezdikpen jasalǵan qylmys retinde saralaýdan alyp, QK-niń 99-babynyń 1-bóligine qaıta saralaýdy jáne jazany jeńildetýdi suraıdy.

Kelesi kúni jábirlenýshi tarap úkimniń moraldyq zııandy óteý bóligin de apellıatsııalyq tártippen shaǵymdandy. Materıaldar apellıatsııalyq sot alqasyna joldandy.

Jábirlenýshi taraptyń advokaty Aıanhan Omarov Kazinform-ǵa habarlaǵandaı, Nuraı Serikbaıdyń ólimine qatysty apellıatsııalyq sot otyrysy qyrkúıek aıynyń sońynda ótýi múmkin.