Ómirzaq Shókeevtiń qoǵamdyq qabyldaýyna 100-ge jýyq adam keldi
TÚRKІSTAN. QazAqparat - Túrkistan oblysynyń ákimi Ómirzaq Shókeev turǵyndardy jeke máseleleri boıynsha qabyldaýda, dep habarlaıdy QazAqparat óńir basshysynyń baspasóz qyzmetine silteme jasap.
Oblys ákimdigine aýdan-qalalardan kelgen 100-ge jýyq adam jınaldy. Suraqtar san alýan. Oblys turǵyndary aımaq basshysyna áleýmettik, kásipkerlik, turǵyn úı máseleleri tóńireginde ótinish-tilekterin jetkizdi. Jeke qabyldaýǵa kelgen azamattardy muqııat tyńdaǵan oblys basshysy aıtylǵan usynystar nazarǵa alynatynyn jáne zań aıasynda oń sheshimin tabatynyn aıtýda.
Aıta keterligi, Ómirzaq Estaıuly halyqpen qoıan-qoltyq jumys jasap keledi. Onyń ústine, turǵyndardyń memlekettik organdarǵa tolǵandyrǵan máselelermen júginýi jeńildedi. Oblys ákimi apparaty basshylarynyń jeke qabyldaýynda ótken jyly 809 azamat kelgen, sonyń ishinde 400-ge jýyq azamat Ómirzaq Estaıulynyń jeke qabyldaýynda boldy.
2019 jylǵy 21 qarashada ótken «Biryńǵaı (ulttyq) azamattardy qabyldaý kúni» sharasy aıasynda barlyq deńgeıdegi ákimdermen (oblys, aýdan jáne qala, aýdandyq mańyzy bar qala, aýyldyq okrýg ákimderimen) 900-den astam azamat qabyldandy. Onyń ishinde 778 ótinish boıynsha túsindirme berilip, 178-i qanaǵattandyryldy.
Azamattyq qoǵam múddesin eskerý, ótinishtermen jumysty ońtaılandyrý maqsatynda Túrkistan qalasynda «Front ofıs» ortalyǵy ashylyp, halyqpen tikeleı jumys júrgize bastady. Sonymen qatar, «Túrkistan – adaldyq alańy» jobalyq keńsesi ashylyp, memlekettik bılik ınstıtýttaryna degen senimin arttyrý, jemqorlyq deńgeıin tómendetý jáne sybaılastyqqa tózbeýshilik mádenıetti qalyptastyrý baǵytynda jumys jandana tústi.
Budan bólek, oblystyń áleýmettik ekonomıkalyq damýy jáne azamattardyń ómir súrý ortasyn jaqsartý maqsatynda Túrkistan oblystyq «Jobalyq keńse» ashylǵan. Atalǵan Keńsede barlyq salalardaǵy Jobalardy iske asyrylýy barysyna qoldaý kórsetilip keledi.
