Ómirzaq Shókeev jyldyń alǵashqy kúni Túrkistandaǵy qurylys alańdaryn aralap shyqty
TÚRKІSTAN. QazAqparat – Túrkistan oblysynyń ákimi Ómirzaq Shókeev jańa 2021 jyldyń alǵashqy kúnin oblys ortalyǵyndaǵy qurylys alańdaryn aralap, qoǵamdyq qaýipsizdik pen kommýnaldyq qyzmet salasynyń jumysshylarymen kezdesýden bastady. Qys aılarynda qala aýmaǵyndaǵy joldardy tazalaıtyn arnaıy tehnıkamen tanysty, dep habarlaıdy QazAqparat tilshisi.
Túrkistan qalasynyń tazalyǵyna jaýapty mamandarmen kezdesip, olarǵa alǵysyn aıtty.
«Túrkistandy taza qalaǵa aınaldyrý maqsatynda tazalyq jumystary kúndelikti qarqyndy júrgizilýde. Tańnyń atysy, kúnniń batysy, meıram, demalys demeı, tynymsyz atqaryp jatqan jumystaryńyz úshin úlken alǵysymdy aıtamyn. Tańmen talasa turyp, qolǵa kúrek alyp, el úshin etken eńbekterińizge rızashylyǵymdy bildiremin», - dedi oblys ákimi.
Qalanyń joldaryn qardan tazartý jáne kóktaıǵaq boldyrmaý maqsatynda 21 birlik arnaıy tehnıka jumyldyrylǵan. Onyń ishinde 7 tehnıka jolaıaqtardy tazalaýda. Kóktaıǵaqtyń aldyn alýmen «Túrkistan jaryq-tazalyq», «Jasyl Túrkistan» jáne «Jasyl arman» mekemeleri aınalysady. Qaladaǵy joldarǵa 245 tonna ınertti materıaldar men arnaıy tuz qory qoldanylýda. Aıta keteıik, jańa jyldyq mereke Túrkistan oblysynda tynysh ótti. Barlyq quqyq qorǵaý organdary kúsheıtilgen rejımde qyzmet atqaryp, aıtarlyqtaı qylmys tirkelmegen. Bul týraly búgin óńir basshysyna ishki ister departamentiniń basshylyǵy baıandady. 109 - Biryńǵaı baılanys ortalyǵynda bolǵan Ómirzaq Shókeev jańadan engizilgen baqylaý júıesiniń jumysymen de tanysty.
«Meıram, demalys kúnderi halyq demalyp jatqanda, biz demalmaýymyz kerek. Kerisinshe, bul ýaqytta jumys kúsheıedi. El tynyshtyǵyn, qaýipsizdigin qamtamasyz etý - eń basty múdde, negizgi mindetimiz», - dedi Ómirzaq Shókeev.
Turǵyndardan túsken barlyq málimetter 109 - Biryńǵaı baılanys ortalyǵynyń arnaıy jasalǵan telegram-bot qosymshasyna habarlama arqyly kelip, sarapshylar tarapynan qadaǵalanyp turady. Óńir basshysy bul kúni shahardaǵy barlyq nysandarǵa jylý beretin ortalyq qazandyqtyń jumysymen de tanysty. Ondaǵy mamandarmen kezdesip, jumys barysyn qarap shyqty. Al, qaladaǵy qurylys alańdarynda jumystar demalys kúnderine qaramastan toqtaýsyz júrýde. Oblys ákimi atqarylyp jatqan jumystardy aralap kórip, karantın talaptarynyń qatań saqtalýyn eskertti. Ómirzaq Estaıuly «Tuńǵysh Prezıdent saıabaǵy» qurylys basynda bolyp, 38 gektar alqaptaǵy kúrdeli jumystar aıaqtalýǵa jaqyn ekenine kóz jetkizdi. Búginde saıabaqtyń bas qaqpasy ornatylyp, jolaıaqtar salynýda. Kógaldandyrý jáne aǵash otyrǵyzý jumystary júrgizilýde. Sýburqaqtar qaptalyp, jasandy kóldiń jaǵalaýy betondalýda.
