Ómirzaq Shókeev: Jumyrtqa eksportyn mıllıard danaǵa jetkizý qajet
Mınıstrliktiń keńeıtilgen májilisinde Ó.Shókeevtiń birinshi orynbasary Arman Evnıev qus sharýashylyǵyn damytý jónindegi salalyq baǵdarlamanyń arqasynda ótken jyly elimizde 5,6 mlrd dana jumyrtqa óndirilgenin aıtty.
«Bul 2017 jylǵy kórsetkishten 10 paıyzǵa artyq. Alǵash ret eksportqa 602 mln dana jumyrtqa shyǵaryldy. Bul da 2017 jylmen salystyrǵanda 2 ese kóp. 190 myń tonna qus eti óndirildi. Aqmola oblysynda Ortalyq Azııadaǵy eń iri qus fabrıkasy iske qosyldy. Onyń bastapqy kezeńdegi jyldyq qýaty 25 myń tonna bolsa, aldaǵy ýaqytta 60 myń tonnaǵa jetedi», - dedi ol.
Osy rette Ómirzaq Shókeev QR Jumyrtqa óndirýshiler qaýymdastyǵynyń prezıdenti Maksım Bojkodan: «Bıyl eksportqa shyǵarylatyn jumyrtqany mlrd danaǵa jetkize alamyz ba?», - dep surady. Al Bojko mundaı múmkinshilik bar ekendigin atap ótti.
Aýyl sharýashylyǵy mınıstri bul máseleni sheshý úshin barlyq múmkinshilikterdi qarastyrýdy tapsyrdy.
«Qajettilik bolsa, biz kómek kórsetemiz, sharalar qabyldaıtyn bolamyz», - dedi Ó.Shókeev.