Ómirzaq Shókeev jol qaýipsizdigin qamtamasyz etý baǵytyndaǵy jumysty kúsheıtýdi tapsyrdy

TÚRKІSTAN.QazAqparat – Túrkistan oblysynda joldardyń sapasyn arttyryp, jol júrý qaýipsizdigin kúsheıtýge qatysty josparlar týraly Saryaǵash aýdanynda oblys ákimi Ómirzaq Shókeevtiń qatysýymen ótken kóshpeli májiliste aıtyldy.

Jıynǵa barlyq tıisti basqarmalar men quqyq qorǵaý organdarynyń basshylary qatysty, dep habarlaıdy QazAqparat tilshisi.

Óńirde jergilikti mańyzy bar avtomobıl joldaryn talapqa saı keltirý úlesin 2020 jyly 77,6 paıyzǵa jetkizý kózdelgen. Al, avtomobıl joldaryna júrgizilgen qurylys-jóndeý jumystarynyń aýqymy boıynsha Túrkistan oblysy respýblıkada kósh bastap tur.

Aǵymdaǵy jyly aımaq boıynsha 15 380 shaqyrym joldyń shuńqyry jamalyp, 45 myń shaqyrymdaı jerde tegisteý jumystary júrgiziletin bolady. Qosymsha 2000 jaryqshamdar ornatylmaq. Jınalysta sondaı-aq, jol-kólik oqıǵalarynyń sany artqany da aıtyldy. Aımaq basshysy jaǵdaıdy turaqtandyrý úshin tolyq taldaý jasap, tıisti sharalar júrgizýdi tapsyrdy. Osy oraıda jol belgileri, baǵdarsham men jyldamdyqty ólsheý quraldary kóbeıtilmek.

Oblys aýmaǵynda jol apattarynyń basym kópshiligi aýdanaralyq, jańa joldarda bolyp jatyr. Oǵan júrgizýshilerdiń jyldamdyqty shekten tys asyrýy sebep, deıdi mamandar. Májiliste sondaı-aq jeke adamǵa qarsy qylmystyq quqyqbuzýshylyqtardyń aldyn alý, óńirdegi etnosaralyq qarym-qatynas pen shekara mańy aýdandaryndaǵy zańdylyqtardyń saqtalý barysy baıandaldy.

Oblys ákimi Ómirzaq Shókeev quqyq qorǵaýshylarǵa bul turǵyda qyraǵylyq tanytyp, halyqtyń tynys-tirshiligin jiti nazarda ustaýdy tapsyrdy.