Ómirzaq Shókeev «Úzdik áleýmettik áriptes» medalimen marapattaldy

ARYS. QazAqparat - «Kásipodaqtar kúni» merekesine oraı QR Kásipodaqtar federatsııasynyń tóraǵasy Eraly Toǵjanov Arys qalasyna arnaıy kelip, oblys ákimi Ómirzaq Shókeevtiń keýdesine tósbelgi taqty, dep habarlaıdy óńir basshysynyń baspasóz qyzmetine silteme jasap.

«Halyqtyń qamy úshin sińirgen eńbegińiz eren. Ony búkil halyq bilip otyr. Arystaǵy apat oryn alǵanda 50 myń halyqty qaýipsiz jerge kóshirip, qańyrap qalǵan tutas bir qalany aıaqqa turǵyzý qyrýar is. Siz syn saǵatta sabyr saqtap, eren eńbektiń úlgisin kórsettińiz. Búkil halyq bir adamdaı jumylyp, eńbek etti. Elińizdiń aldynda abyroıyńyz asqaqtaı bersin», - dedi QR Kásipodaqtar federatsııasynyń tóraǵasy Eraly Toǵjanov.

Sondaı-aq, Arys qalasyn qalpyna keltirý jumystaryna atsalysqan birqatar azamattar QR Premer-Mınıstriniń jáne Respýblıkalyq Kásipodaqtar federatsııasynyń «Alǵys hatymen», «Kásipodaqtarǵa sińirgen eńbegi úshin» tósbelgisimen marapattaldy. Olardyń tiziminde Arys qalasy áskerı bóliminiń tseh tehnıgi, kásipodaq músheleri, qurylysshylar men vagon paıdalaný deposynyń ókili bar. Jıyn Túrkistan oblysy ákimdigi men Qazaqstan Respýblıkasy Kásipodaqtar federatsııasy arasynda áleýmettik áriptestik memorandýmyna qol qoıý rásimine jalǵasty. Kásipodaqqa senim artqan azamattardyń jalpy sany boıynsha Túrkistan oblysy elimiz boıynsha kósh bastap tur.