Ómirzaq Shókeev úılerin sel shaıǵan Tólebı aýdanynda boldy
LEŃGІR. QazAqparat - Túrkistan oblysynyń ákimi Ómirzaq Shókeev bir top depýtattarmen birge Tólebı aýdany, Leńgir qalasynyń turǵyndarymen kezdesip, jańadan salynyp jatqan baspanalardy baqylap qaıtty, dep habarlaıdy QazAqparat.
Óńir ákimdiginen málim etkendeı, munda kóktemgi sel saldarynan apatty kúıge túsken úıler tolyq jańadan salynyp jatyr. Qıraǵan 9 úı jańa jerge salynady. Qalǵandary buzylyp, qaıta turǵyzylýda. Óńir basshysy «Alataý» móltek aýdanynda boı kótergen osy úılerdiń qurylys jumystarymen tanysty.
«Jyldar boıy kóktemde kúpti kóńilmen kúı keshetin edik. Endi mine, ómirimiz túbegeıli ózgereıin dep tur. Sol úshin sizderge sheksiz alǵys bildiremiz. Qıyndyqtardy eńserýge kómektesip jatqan, janymyzdan tabylyp, jyly sózben demep júrgen sizderge halyq rıza», – dedi oblys ákimimen kezdesken Leńgir qalasynyń turǵyny Marııa Kornılova.
Oblys basshysy budan keıin Dostyq eldi mekenindegi turǵyn úılerdiń qurylys barysyn baqylady. Onda sel shaıǵan úıler buzylyp, ornyna jańa baspanalar salynyp jatyr. Ómirzaq Shókeev úılerdiń sapasyna basa nazar aýdarýdy talap etti.
Eske salaıyq, Tólebı aýdanynda nóserli jaýyn saldarynan apatty dep tanylǵan jalpy 38 baspana tolyq súrilip, qaıta salynýda. Qurylys jumystary shilde aıyna deıin tolyq aıaqtalmaq.
Sondaı-aq joldar men kópirler jaramsyz kúıge túsip, ınfraqurylym isten shyqqan bolatyn.
