Ómirzaq Shókeev Úkimetten ońtústiktegi sharýalardyń qyryqqabatyn ótkizýge kómek surady
NUR-SULTAN. QazAqparat – Túrkistan oblysynyń ákimi Ómirzaq Shókeev Úkimetten óńirdegi sharýalardyń qyryqqabatyn ótkizip berýge kómek surady. Onyń aıtýynsha aımaqta qazir satylmaı jatqan 250 myń tonna qyryqqabat bar, dep habarlaıdy QazAqparat tilshisi.
«Túrkistan oblysynda 300 myń tonna qyryqqabat ósirdi. Biraq qazir Reseıden suranys birden tómendep ketti. Biz oblystardyń bárimen memorandýmǵa qol qoıǵanymyzben olar da almaı jatyr. Sondyqtan oblysta osyndaı ózekti máselemen betpe-bet keldik», - dedi Úkimet otyrysyna onlaın rejımde qosylǵan Ómirzaq Shókeev.
Túrkistan óńiriniń ákimi qyryqqabattyń bir kelisi 10-15 teńgege deıin tómendep ketkenin jetkizdi.
«Fermerler úlken shý kóterip jatyr. Sondyqtan mınıstrliktermen birge múmkindikterdi qarastyrǵan jón sekildi. Bálkim oblystarmen, Reseıdegi logıstıkalyq kompanııalarmen birge osy jumysqa kirisken abzal. Bizde qazir 250 myń tonna qyryqqabat daıyn tur. Ony satpasaq úlken problemaǵa aınalatyn sekildi», - dedi Ómirzaq Shókeev.
Bul rette Úkimet basshysy Asqar Mamın Aýyl sharýashylyǵy mınıstri Saparhan Omarovqa Túrkistannyń sharýalaryna kómek kórsetý kerektigin tapsyrdy.
