Ómirzaq Shókeev: Tyıymdar bóget bolmaı turǵan toılardy toqtatý kerek

TÚRKІSTAN. QazAqparat - Eshbir tyıym bóget bola almaı turǵan toı-tomalaqty toqtatý kerek. Túrkistan oblysynyń ákimi Ómirzaq Shókeev kezekti apparat otyrysynda osylaı dedi, dep habarlaıdy QazAqparat.

Óńirdegi epıdemıologııalyq ahýal baıandalǵan otyrysta sońǵy kórsetkishter málim etildi. Odan belgili bolǵandaı, oblys aýmaǵynda otbasylyq, merekelik is-sharalar toqtamaı tur. Búgingi kúnge deıin 535 tyıym salynǵan shara ótse, onyń 226-y qoǵamdyq tamaqtaný oryndarynda, qalǵany turǵyndardyń óz aýlasynda ótkizilgen.

Osyǵan oraı barlyq aýdan, qala ákimderi aımaq basshysynyń qatań synyna ushyrady. Eldegi epıdemıologııalyq ahýaldy bile tura, sanıtarlyq talaptardyń saqtalýyn baqylaý maqsatynda tynymsyz júrgizilip kele jatqan tekserýlerdi elemegenderge jaza, jaýapty basshylarǵa shara qoldanylmaq.

«Toı-tomalaq barlyq aýdandarda bar. Epıdemıologııalyq jaǵdaıdyń qanshalyqty kúrdeli ekenin bile tura, toı jasaıtyndardy toqtatý kerek. Toıǵa jan-jaqtan tamyr-tanys jınalady. Buǵan tosqaýyl qoıylmasa, qalǵan tirliktiń bári beker. Tez arada tıisti shara qoldanylsyn», - dedi Ómirzaq Shókeev.

Sońǵy bes aıda oblys boıynsha jasaqtalǵan 119 mobıldi top quramy jáne aýmaqtyq Polıtsııa basqarmalary qyzmetkerleri tarapynan 36765 nysan tekserilip, karantın talabyn buzýdyń 5 194 faktisi anyqtaldy.