Ómirzaq Shókeev Túrkistannyń medıtsına qyzmetkerlerimen kezdesti
TÚRKІSTAN. QazAqparat - COVID-19 ınfektsııasymen kúres kúsheıtildi. Qaýipti dertti anyqtap, onymen kúresýge dárigerler de daıyn. Birneshe ret daıyndyq kýrstarynan ótken Túrkistan oblysynyń medıtsına qyzmetkerlerimen oblys ákimi Ómirzaq Shókeev kezdesti. Saıram aýdandyq ortalyq aýrýhananyń qyzmetkerleri aımaq basshysyna búkil boljamdy jumystaryn tanystyrdy, dep habarlaıdy QazAqparat.
Oblys basshysy jaqyn kúnderi paıdalanýǵa beriletin jańa emhanany aralap, búgingi kúngi dıagnostıka qory men oqshaýlaý, rezervti tósek-oryndardy tekserdi. Emdeý mekemesi jospar boıynsha kúnine 500 kelýshige eseptelgen.
Álemdi dúrbeleńge salǵan pandemııalyq indet óńirde beleń alǵan jaǵdaıda jańa ǵımarat 100 tósek oryndyq observatsııalyq gospıtal retinde qyzmet kórsetedi. Medıtsınalyq mekeme tıisti dári-dármektermen tolyq qamtamasyz etilip, jasaqtalǵan 4 brıgada mamandary saqadaı saı.
Aýdandyq aýrýhananyń dárigerleri Aqsýkent aýylynda ornalasqan «Mankent» temirjol stansasynda da kúndiz-túni qyzmet arqarýda. Olar arnaıy qurylǵy arqyly jolaýshylardyń dene qyzýyn ólshep, dárigerlik tekserý júrgizedi.
