Ómirzaq Shókeev Túrkistannyń áleýmettik-ekonomıkalyq damýyna oń baǵa berdi
TÚRKІSTAN. QazAqparat – Túrkistan oblysynyń basshysy Ómirzaq Shókeev Túrkistan qalasynyń ótken jylǵy áleýmettik-ekonomıkalyq damýyna oń baǵa berdi, dep habarlaıdy QazAqparat óńir ákimdigine silteme jasap.
«Biz, Túrkistan qalasyna tarıhı mártebe berý – Elbasynyń jobasy ekenin esten shyǵarmaýymyz kerek. Sol sebepti, tarıhı qalanyń ereksheligin saqtaı otyra, ony zamanaýı baǵytta damytýdyń negizgi úsh baǵytyn júzege asyryp kelemiz. Ol úsh baǵyttyń biri – tarıhı-mádenı aımaq. Ekinshisi – ákimshilik-iskerlik ortalyq, úshinshisi – eski qalany jańǵyrtý», – dedi oblys ákimi Ómirzaq Shókeev Túrkistan qalasynyń ákimi Rashıd Aıýpovtyń halyqqa esep berý kezdesýinde.
Oblys ortalyǵynyń áleýmettik-ekonomıkalyq damýyna oń baǵa bergen óńir basshysy birqatar tapsyrma júktedi.
«Túrkistandy damytýda ózekti máselelerdiń biri – qala halqyn 100 paıyz tabıǵı gazben jáne sarqyndy sý júıesimen qamtamasyz etý. Sebebi, tabıǵı gazben tolyq qamtý arqyly qalanyń ekologııalyq ahýalyn jaqsarta alamyz», – degen Ómirzaq Shókeev jazdyń aptap ystyǵynda qolaıly klımat qalyptastyrý úshin qalany sýlandyrý men kógaldandyrýdy qolǵa alý mindetin atap ótti.
«Qala turǵyndary men jańadan qonystanýshylar tarapynan turǵyn úıge degen suranys artýda. Osyǵan sáıkes, salynatyn turǵyn úılerdiń sanyn arttyrý jáne syrtqy kelbeti men sapasyna mán berýimiz, turǵyn úılerdi ınjenerlik-ınfraqurylymmen (abattandyrý, gaz, sý, káriz, elektr jaryǵy, jylý, baılanys toraby jáne taǵy basqasy) tolyqtaı qamtamasyz etýimiz kerek. Basty maqsat – Túrkistan qalasynyń turǵyndary men qonaqtaryna jaıly, qaýipsiz, taza, kórikti de ásem qalaǵa aınaldyrý», – dedi Ó. Shókeev.
Aıta keteıik, ákimshilik iskerlik ortalyǵynda jalpy aýdany 575,8 myń sharshy metr nemese 7459 páterdi quraıtyn 156 kópqabatty turǵyn úıdiń qurylysy júrgizilýde. 2019 jyldyń qorytyndysymen 32 úıdiń qurylysy aıaqtalyp, 1701 páter paıdalanýǵa berildi.
Sondaı-aq, 2019 jyly qala boıynsha 100 kóshe asfalttalsa, bıyl taǵy da 100 kóshege asfalt tóseletin bolady.
