Ómirzaq Shókeev túrkistandyqtarǵa arnaıy málimdeme jasady
TÚRKІSTAN. QazAqparat – Túrkistan oblysynyń ákimi Ómirzaq Shókeev koronavırýs dertine baılanysty ońtústikke kirip-shyǵýdy táýlik boıy qadaǵalaý úshin ashylǵan arnaıy jasaqtalǵan bekette boldy. Eldegi tótenshe jaǵdaıǵa baılanysty ashylǵan arnaıy bekettiń jumysyn tekserip, turǵyndarmen tildesken aımaq basshysy oblys halqyna arnaıy málimdeme jasady, dep habarlaıdy QazAqparat tilshisi.
«Qurmetti jerlester, aýdan turǵyndary! Kúni keshe Elbasy, Qazaqstannyń Tuńǵysh Prezıdenti Nursultan Nazarbaev halyqqa úndeý jarııalap, el Prezıdenti Qasym-Jomart Toqaev pen Úkimet tarapynan iske asyrylyp jatqan shuǵyl sharalardy qoldaýǵa shaqyrdy. Syrttan kelgen indetpen kúreste ákimdikpen birge mekeme basshylary, qoǵamdyq uıymdar, belsendi azamattar bul iske qatysýda. Oblystaǵy ahýaldy turaqty saqtaý úshin 18 naýryzdan bastap Almaty jáne Qyzylorda baǵytyndaǵy shekaralyq aımaqtardaǵy «Saýran» jáne «Shaqpaq» beketterinde koronovırýs dertine baılanysty táýlik boıy jumys isteıtin blok-posttar qoıyldy. Eki táýlik ishinde «Shaqpaq» beketteri arqyly ótken 6000-ǵa jýyq adam tekserilgen. Blok - postta arnaıy 4 teplovızor ornatylǵan. Shuǵyl áreket etý maqsatynda 30-den astam dáriger, medıtsınalyq jedel-járdem qyzmetiniń brıgadasy da jumyldyrylyp otyr. Budan bólek, temirjol, áýejaı, qalaaralyq beketter men shekaralarda sanıtarlyq jumystar qyzý júrýde. Іndetpen kúrestiń kúndelikti jumys barysy oblys ákimdiginde ashylǵan sıtýatsııalyq ortalyq arqyly qalyń halyqty habardar etýde. Bul vırýs – tez taraıtyn vırýs. Oblysqa kelip jatqan azamattar, ózderiniń derekterin blok-postta qaldyryp, ózderi barǵan jerdegi jergilikti ákimdikti de habarlap otyrýyn mindetteımiz. Túrkistan oblysyndaǵy barlyq aýrýhanalarda koronavırýstyń taralýyna jol bermeý sharalary kúsheıtildi. Emdeý mekemeleri jappaı karantınge kóshken. Tótenshe jaǵdaı jarııalanǵan sátten, oblysta provızorlyq gospıtaldar ashylyp, 440 oryn daıarlandy. Bul mekemelerde qazirgi tańda karantınde 30 adam jatyr. 18 adam dárigerlik tekserýden keıin úılerine shyǵaryldy. Provızorlyq gospıtaldar barlyq aýdanda ashylatyn bolady. Durys túsinińizder, bizde koronavırýspen aýyratyn naýqastar tirkelgen joq. Degenmen, biz eldigimizdi kórsetip, aýrýdyń aldyn alý sharalaryn júzege asyrýymyz kerek. Bul indettiń taraýyna tosqaýyl qoıý úshin adamdar kúndelikti júris-turysyn shektep, qoǵamdyq oryndarǵa barmaýy qajet. Toıhana, meıramhanalar jabyldy, qoǵamdyq kólikterdi de toqtatamyz. Biz osyndaı jumystar arqyly «Bir jeńnen qol, bir jaǵadan bas shyǵaryp» bul indetti jeńip shyǵýymyz kerek», – dedi oblys basshysy.
Aıta keteıik, Elbasy óz úndeýinde qıyn kezeńde el-jurtqa kómekteskisi keletin jáne járdem bere alatyn adamdardyń qarajaty jınaqtalatyn Respýblıkalyq qor qurýdy usynǵan bolatyn. Túrkistan oblysynda Arystaǵy tótenshe jaǵdaı oryn alǵan kezde nátıjeli jumys istegen «Túrkistan» korporatıvtik áleýmettik damý qory bar. Elbasynyń tapsyrmasyna oraı, atalǵan qorǵa oblys ákimdigi, basqarmalar men oǵan qarasty mekemeler búgin bir kúndik jalaqylaryn aýdarady. Bastamany qoldaǵan bıznes ókilderi tarapynan da qorǵa aqsha aýdarmaq. Sondaı-aq, óńirde tótenshe jaǵdaıǵa baılanysty «Túrkistan» korporatıvtik áleýmettik damý qorynyń janynan qamqorshylyq keńesi quryldy. Qamqorshylyq keńesiniń quramyna «Nur Otan» partııasy, kásipkerler, ardagerler keńesiniń ókilderi kiredi. Bul qor oblystaǵy az qamtamasyz etilgen otbasylarǵa azyq-túlik pen gıgıenalyq zattar bóledi. Qajetti zattardy taratýǵa eriktiler, «Jas Otan» jastar qanaty belsenip otyr.
«Alańdaýǵa negiz joq. Túrkistan oblysynyń aýmaǵynda koronavırýs tirkelgen joq. Saqtyq sharalary kúsheıtilgen tártipte júrip jatyr. Azyq-túlik qory jetkilikti, baǵalardy negizsiz ósirýge jol bermeımiz. Qurmetti jerlester! Dál qazir búkil álem qıyn kezeńde tur. Alaıda, biz bul qıyn-qystaý ýaqyttan da birlik pen yntymaqtyń arqasynda aman-esen ótemiz dep senemin! Qazirgi tańda bizge tynyshtyq kerek, jalǵan aqparattarǵa senbeńizder. Resmı aqparat pen buqaralyq aqparat quraldaryna ǵana senińizder. Biz kúndelikti jaǵdaıdy qatań baqylaýda ustap otyrmyz. Biz birgemiz!» - dep túıindedi Ómirzaq Estaıuly.
Jalpy, Jambyl oblysynan Túlkibas aýdanyna kireberistegi «Shaqpaq» beketinde ornatylǵan blok-post arqyly Almaty, Nur-Sultan qalalary men Jambyl oblysynan keletin barlyq avtokólikter júrip ótedi. Kúre joldyń boıynda ashylǵan arnaıy bekette polıtsııa men dárigerler árbir kólikti toqtatyp, arnaıy qurylǵymen azamattardyń dene qyzýlaryn ólshep, tekseristen ótkizýde. Óńir basshysy bul kúni Túlkibas aýdanyndaǵy temir jol vokzalyndaǵy qolǵa alynǵan saqtyq sharalaryn da pysyqtady. Jaýapty sala mamandarynyń jumyldyrýymen shoıyn jol beketterinde jer jahanda úreı týdyrǵan qaýipti indettiń taralýyna jol bermeý úshin arnaıy tekserý orny jasaqtalǵan. Munda eki táýlikte 16 poezd júrip ótip, 200-den astam jolaýshy tekserilgen. Barlyǵy din aman ekeni anyqtalǵan.
