Ómirzaq Shókeev túrkistandyq ustazdardy merekemen quttyqtady
TÚRKІSTAN. QazAqparat – Túrkistan oblysynyń ákimi Ómirzaq Shókeev ustazdardy kásibı merekelerimen quttyqtady, dep habarlaıdy QazAqparat.
Saltanatty sharaǵa óńirdiń bilim berý salasynyń 400-den astam ókili qatysty. Urpaq tárbıeleýde talmaı eńbek etip júrgen ustazdardyń tól merekesine arnalǵan «Merekelerińizben, ulaǵatty ustazdar!» atty sharanyń shymyldyǵy «Abaı ósıeti» teatrlyq kórinisimen ashyldy.
Túrkistan oblysynyń ákimi Ómirzaq Shókeev pedagogtarǵa óz alǵysyn bildirip, merekelerimen quttyqtady. Aımaq basshysy óziniń tulǵa bolyp qalyptasýyna yqpal etken mektep muǵalimderin eske alyp, olarǵa degen jyly lebizin bildirdi.
Eldiń erteńin aıqyndaıtyn, onyń básekelestik qabiletine yqpal etetin asa mańyzdy sala maıtalmandary Túrkistan oblysy ákiminiń qurmet gramotalarymen, alǵys hattarymen marapattaldy.
Shákirtterin bilim nárimen sýsyndatyp, jaqsy qasıetterdi boıyna darytatyn ustazdarǵa degen halqymyzdyń qurmeti qashanda erekshe. Jıynda Jastar jylyna oraı ótken «Úzdik jas muǵalim-2019» oblystyq baıqaýynyń jeńimpazdary marapattaldy.
«Aldaǵy ýaqytta oblysta «Daryn» mektepterin kóbeıtemiz. Qarasha aıynda «Daryn» ǵylymı-ádistemelik ortalyǵy, 2020 jyly «Oqýshylar saraıy» ashylady. Zamanaýı bilim oshaqtary boı kóterip, oqýshylardyń bilimge degen qushtarlyǵyn arttyrýǵa barlyq jaǵdaı jasalady. Muǵalim biliktiligin arttyrýdy damyta túsemiz. Bizdiń óńirden maqtanyshpen aıta alatyn talaı myqty maman shyǵyp jatyr. Osy úrdisti jalǵastyryp, damytyp, kúsh salýymyz kerek», - dedi Ómirzaq Shókeev.
Túrkistan oblysy ákimdiginiń málimetine sáıkes, búginde óńirde 60 myńǵa jýyq pedagog eńbek etedi. Byltyrǵy jyly óńirimizdiń 150-ge jýyq oqýshysy halyqaralyq jáne respýblıkalyq deńgeıdegi bilim saıystarynda júldeli oryndarǵa ıe boldy. Jaqynda ǵana «Úzdik pedagog-2019» respýblıkalyq baıqaýyna óńirimizden 9 ustaz qatysyp, úsheýi bilim saıysynyń ozyǵy atandy. Elimizde ustazdar qaýymynyń tól merekesi qazan aıynyń alǵashqy jeksenbisinde atap ótiledi. Saltanatty rásim ári qaraı án-kúımen, bı shashýlarymen jáne teatrlanǵan qoıylymdarmen jalǵasty.
