Ómirzaq Shókeev túrkistandyq sportshylarmen kezdesti
TÚRKІSTAN. QazAqparat - Túrkistan oblysynyń ákimi Ómirzaq Shókeev halyqaralyq jarystarda el abyroıyn asqaqtatyp júrgen sportshylar men olardyń bapkerlerimen kezdesti, dep habarlaıdy QazAqparat.
Aımaq ákimdiginiń baspasóz qyzmetinen málim etkendeı, kezdesýge bokstan QR eńbegi sińgen jattyqtyrýshy Myrzaǵalı Aıtjanov, toǵyzqumalaqtan QR eńbegi sińgen jattyqtyrýshy Kamıla Kópbaeva, bokstan QR halyqaralyq dárejedegi sport sheberi, Azııa chempıony Bek Nurmaǵanbet, toǵyzqumalaqtan QR eńbegi sińgen sport sheberi Ásel Dálıeva, toǵyzqumalaqtan QR halyqaralyq dárejedegi sport sheberi, Álem chempıony Lına Karımova jáne toǵyzqumalaqtan sport sheberi, Álem chempıonatynyń kúmis júldegeri Saıat Jandarbek qatysty.
Bıyl sáýir aıynda Túrkııanyń Antalııa qalasynda ótken Álem chempıonatynda toǵyzqumalaqtan jarysqa túsken jerlesterimiz sátti óner kórsete bildi. Qazaqstannan jıyrmaǵa jýyq sportshy qatysqan dúbirli básekede túrkistandyqtar 2 altyn jáne 2 kúmis medalǵa qol jetkizdi. Atap aıtsaq, Ásel Dálıeva bir altyn jáne bir kúmis medal alsa, Lına Karımova el qorjynyna altyn júlde saldy. Al Jandarbek Saıat kúmis medal enshiledi. Osylaısha, oblystyń 2 óreni álem chempıony atandy. 
Sonymen qatar Taılandtyń Bangkok qalasynda uıymdastyrylǵan bokstan eresekter arasyndaǵy Azııa chempıonatynda túrkistandyq Bek Nurmaǵanbet jeńimpaz atanǵan bolatyn.
Oblys ákimi Ómirzaq Shókeev eldiń abyroıyn asqaqtatqan sportshylar men bilikti jattyqtyrýshylarǵa qurmet kórsetip, syı-sııapat jasady. Óz kezeginde sportshylar qaýymy óńir basshysyna rızashylyqtaryn bildirip, aldaǵy baıraqty básekelerde jeńisti joldy jalǵastyrýǵa kúsh salatyndaryn jetkizdi.
