Ómirzaq Shókeev: Túrkistandy bes baǵyt boıynsha damytamyz
TÚRKІSTAN. QazAqparat - Túrkistan oblysyn damytýdyń bas baǵyty aıqyndaldy. Bul týraly búgin altynshy shaqyrylymdaǵy oblystyq máslıhattyń kezekti XXXVII sessııasynda oblys ákimi Ómirzaq Shókeev málim etti, dep habarlaıdy QazAqparat.
Oblystyq máslıhat depýtaty N.Ábishov tóraǵalyq etken jıynǵa oblystyq aýmaqtyq saılaý komıssııasynyń tóraǵasy, aýdan, qala ákimderi men máslıhat hatshylary, oblystyq basqarmalardyń jáne uıymdardyń basshylary, BAQ ókilderi qatysty.
Kún tártibinde 28 másele tyńdaldy. Atap aıtqanda, Túrkistan oblysynyń basqarý shemasyn bekitý, oblystaǵy 24 basqarmany qaıta qurý, Túrkistan oblysy bıýdjetiniń kiris bóligin tolyqtyrý jáne tabystyń ósýiniń jańa rezervterin anyqtaý boıynsha atqarylǵan jumystar týraly, oblys ákimdiginiń memlekettik-jekeshelik áriptestik jobalarynyń iske asyrylý barysy syndy birqatar máseleler qaraldy.
Jıynda oblystyq basqarmalardyń jáne uıymdardyń basshylary baıandama jasady. Sondaı-aq sessııada depýtattar usynystaryn jetkizdi. Oblys ákimi Ómirzaq Shókeev aldaǵy ýaqyttaǵy atqaratyn josparlaryn jarııalap, Túrkistan oblysynda júzege asatyn tyń jobalardy tanystyryp, naqty mindetterin atap ótti.
«Turǵyndardyń áleýmettik jaǵdaıyn jaqsartý jáne ekonomıka men bızneske qolaıly jaǵdaı jasaý arqyly Túrkistan oblysyn kórkeıtý boıynsha mindet qoıyp otyrmyz. Osy maqsatta biz óńirdiń damýyna serpin beretin naqty jumystar atqarýymyz qajet. Eń aldymen, júıeli nátıje beretin, bıyldyń ózinde halyqqa tıimdi bolatyn ózekti máselelerdi sheshýge baǵyttalǵan basym baǵyttardy nazarǵa alýymyz qajet. Men osy maqsatqa jetý úshin basymdyq beretin 5 negizgi baǵytty aıqyndadym. Bul - Túrkistan qalasyn damytý, Túrkistan oblysynyń mádenı-rýhanı salasyn jańǵyrtý, aýdan, qala jáne aýyldardy damytý, agroónerkásip keshenin jáne ındýstrıaldy aımaqtardy kóterý», - dedi Ómirzaq Shókeev.
Jıyn sońynda oblys basshysy atalǵan jobalardy iske asyrý arqyly óńirdiń ekonomıkalyq jaǵdaıyn kóterýge, halyqtyń ál-aýqatyn jaqsartýǵa kúsh jumsaıtynyn jetkizdi.
«Bizdiń aldymyzda qaladaǵy ákimshilik-iskerlik ortalyǵy jáne rýhanı-mádenı nysandardyń qurylysyn ýaqtyly ári sapaly júrgizý mindeti tur. Jalpy oblys ortalyǵynda 89 nysannyń qurylys jumystary júredi. Biz qalanyń eski bóligin damytý máselesin de umytpaýymyz kerek. Túrkistannyń eski shaǵynaýdandarynyń ınfraqurylymyn damytý, sý jáne gaz, káriz júıelerine jóndeý jumystary qajet. Naqtyraq aıtsaq, Túrkistan qalasyndaǵy úlken 5 kóshe kúrdeli jóndeýdi talap etedi. Al 27 kóshege orta jóndeý kerek. Jalpy, 62 shaqyrym jol retteledi. Sonymen birge, ortalyq kóshelerdiń jan-jaǵyn abattandyrý josparymyz bar. Shamamen 42 shaqyrym kóshege jaryqtandyrý, trotýar salý jumystary júrgiziledi. Bıyl jazda kóshelerdiń, qalanyń kórkeıgenin turǵyndar óz kózimen kórýi qajet», - dedi oblys ákimi Ómirzaq Shókeev.
Budan ózge, óńirdiń úzdik sala mamandary Túrkistan oblysynyń qurmet gramotasymen jáne Túrkistan oblystyq máslıhatynyń gramotasymen marapattaldy. 
