Ómirzaq Shókeev Túrkistandy abattandyrý jumystaryn tekserdi
Óńir basshysy aldymen, Nursultan alańy men oǵan jaqyn ornalasqan gúlzarǵa bardy. Búginde nysannyń qurylys-montaj jumystary óndiristik kestege sáıkes júrgizilýde. Nysan aýmaǵynda jaıaý júrginshi joldar men sýburqaqtarynyń betondaý jumystary aıaqtalǵan.
Sodan keıin aımaq basshysy Tuńǵysh Prezıdent saıabaǵy men «Áziret sultan» qoryq-murajaıynyń aýmaǵyn abattandyrý jumystaryn baqylap, jelilik saıabaqty aralady.
Tuńǵysh Prezıdent saıabaǵynda syrtqy sýǵarý júıeleriniń qurylysy, aǵashtardy otyrǵyzý, gazon tóseý jumystary, sonymen birge, aıaqjoldar, kerýen joldary jáne kanal jumystarynyń 95 % aıaqtalǵan. Osy aıda 295 túp aǵash jáne 6500 buta otyrǵyzý kózdelýde.
«Áziret sultan» qoryq-murajaıynyń aýmaǵyn abattandyrý boıynsha jumystary 4 kezeńge bólingen. Murajaı aýmaǵynda jer tegistelip, sý jáne káriz júıesi tolyq aıaqtalǵan. Sýburqaq alańyna beton quıý jumystary oryndaldy. Al, kógaldandyrý aımaǵyna sýarý júıesin ornatý jumystary 60%-ǵa oryndalyp, gazon egý jumystary atqarylýda.
Aımaq basshysy sondaı-aq jelilik saıabaqta boldy. «Jelilik saıabaq» abattandyrýy aıaqtalýǵa jaqyn. Qazirgi tańda syrtqy sýǵarý júıeleriniń qurylysy, aǵashtardy otyrǵyzý, gazon tóseý jumystary, sonymen birge, aıaqjoldar, kerýen joldary jáne kanal jumystary aıaqtalýǵa taıaý.
Sonymen qatar, «Kongress hol», stadıon, oqýshylar saraıy, drama teatr, «Rixos Turkestan» qonaqúıi, «Uly dala eli», Ǵylymı-ámbebap kitaphanasynyń qurylys jumystary qarqyndy júrgizilýde. Ondaǵy jumys barysyn baqylap, jumysshylarmen tildesken Ómirzaq Shókeev jaýapty basshylarǵa jumysty kúsheıtýdi tapsyrdy.
Túrkistan oblysy ákiminiń baspasóz qyzmeti