Ómirzaq Shókeev Túrkistandaǵy turǵyn úılerdiń qurylysymen tanysty
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistan qalasynda bıyl paıdalanýǵa beriletin turǵyn úı qurylysy nysandaryn aralap, sapasyn tekserdi. Sondaı-aq sala basshylary men merdiger kompanııalardyń qojaıyndarymen kezdesti, dep habarlaıdy QazAqparat tilshisi.
Búginde oblys ortalyǵyndaǵy ákimshilik-iskerlik ortalyq aýmaǵynda 7 qabatty 14 turǵyn úıdiń jáne 12 qabatty 40 turǵyn úıdiń qurylysy júrip jatyr. Munymen qatar Batys Qytaı – Batys Eýropa tasjolynyń boıynda 7 qabatty 10 turǵyn úı boı kóterdi. Jańa baspanalardy salý jumystary eki aýysymda júrgizilýde. Buǵan qosa, qazirgi tańda ákimshilik-iskerlik ortalyqtyń aýmaǵynan jeke qurylys kompanııasy óz qarajaty esebinen 12 qabatty 32 turǵyn úıdiń qurylysyn júrgizse, jyl sońyna deıin 12 turǵyn úı tapsyrylady dep josparlanyp otyr. Jalpy qurylysqa 600-den astam jumysshy jumyldyrylǵan.
Nysandardyń sapasyn kórip shyqqan Ómirzaq Shókeev mundaǵy jumystardyń baıaý júrip jatqanyn aıtyp ótti. Merdigerlerge nysandardy belgilengen merziminde salýdy tapsyrdy. Bul rette, sala mamandary tehnıkalyq qadaǵalaýshy mekemege eskertý hattar joldanyp, óndiristik kesteden artta qalyp qoıǵan birqatar merdiger mekemelerge aıyppuldar salynǵanyn jetkizdi. Jaýaptylar jumys qolynyń tapshylyǵy men qaǵazbastylyqtyń qolbaılaý bolatynyn alǵa tartty. Búginde merdiger mekemeler tarapynan turǵyn úı qabattarynyń kolonnalaryn kóterý men qabataralyq jabyndarynyń armatýrasyn toqý, betonyn quıý jumystary júrgizilip jatyr. Jańa páterlerdi óz kózimen kórip, jumystardy pysyqtaǵan oblys ákimi qurylys kompanııalarynyń basshylaryna jumysshylar sanyn arttyrýdy jáne ınfraqurylymdyq júıeniń tutynýǵa saqadaı saı bolý keregin qadap aıtty.
