Ómirzaq Shókeev Túrkistandaǵy qurylysy aıaqtalǵan birqatar nysandy kórdi
TÚRKІSTAN. QazAqparat – Oblys ákimi Ómirzaq Shókeev Túrkistan qalasyndaǵy birqatar nysandy aralady. Qurylysy aıaqtalǵan ǵımarattardyń jumys barysyn teksergen óńir basshysy jumysshylardyń saqtyq sharalaryn saqtaýy basty nazarda bolýy kerektigin tapsyrdy, dep habarlaıdy QazAqparat tilshisi.
Aımaq basshysy bekitilgen barlyq talaptardy qatań saqtaýdy jáne qurylystyń báseńdemeýin mindettedi.
Búginde Túrkistan qalasyndaǵy ákimshilik-iskerlik ortalyǵy aýmaǵynda boı kótergen ǵımarattardyń ishki árleý jáne jıhaz ornatý jumystary júrip jatyr. Kongress holl kópsalaly ǵımaratynyń qurylysy aıaqtalýǵa jaqyn. Jalpy 3,1 ga ǵımarattyń ishki aýmaǵy 12000 sharshy metrdi qamtıdy. Oblys ákimi turǵyn úıler men álemdik talapqa saı boı kótergen «RIXOS» jáne Hempton qonaq úıleri, Kerýen saraı, kitaphana, Tuńǵysh Prezıdent saıabaǵy men «Áziret-Sultan» qoryq murajaıyndaǵy qurylys jáne abattandyrý jumystaryn tekserdi. Ómirzaq Estaıuly qurylysqa atsalysyp jatqan sheteldik kompanııa jetekshilerimen kezdesip, jumys barysyndaǵy birqatar ózgeristerdi talqylady.
