Ómirzaq Shókeev Túrkistandaǵy qurylys sapasyn baqylaýdy tapsyrdy
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistandaǵy birqatar qurylys nysandaryn aralady, dep habarlaıdy QazAqparat tilshisi.
Aımaq basshysy aldymen salynyp jatqan Ákimshilik-iskerlik ortalyǵynda boldy. Búginde ǵımarattyń qurylys jumystaryn 2019 jyldyń jeltoqsan aıynda aıaqtaý josparlanyp otyr. Qazirgi tańda ol jerde oblystyq ákimdik ǵımarattarynyń qurylysy júrýde.
Sondaı-aq, óńir basshysy «Nur-Sultan» alańy men Medıa ortalyqty aralap kórdi. Almaty qalasynyń tapsyrysymen salynyp jatqan nysannyń jalpy kólemi – 3 myń sharshy metrdi quraıdy.
Qurylys-montajdaý jumystary 2019 jyldyń aqpan aıynda bastalǵan bolatyn. Túrkistan qalasynyń rýhanı-mádenı aımaǵynda sonymen qatar Qostanaı oblysynyń tapsyrysymen «Neke saraıy» da salynýda. Onyń jalpy aýmaǵy – 0,36 ga. Budan bólek, Ákimshilik-iskerlik ortalyǵynan boı kóteretin kópqabatty turǵyn úıdiń qurylys jumystarymen tanysty. Onda 12 kópqabatty 36 turǵyn úı keshenin salý josparlanýda.
Jalpy aýdany 207,3 myń sharshy metr bolatyn «Fev grýpp» JShS-i óz qarjysy esebinen 1980 páterli turǵyn úı salynady. Oblys ákimi bul kúni kúrdeli jóndeý júrip jatqan Túrkistan magıstraldy sý arnasynda da boldy. Kentaý tasjolynyń boıyna otyrǵyzylǵan kópjyldyq aǵashtardan aldaǵy kóktemde aınala jasyl jelekke bólenbek.
Aımaq basshysy egilgen kóshetterdi baptap, baqylaýdy muqııat qadaǵalaýdy tapsyrdy.
Ómirzaq Shókeev aýqymdy alqapta boı kótergen «Jelilik saıabaqqa» toqtalyp, ondaǵy balalar oıyn alańyn aralap kórdi. Ákim tıisti salalyq jetekshilerge júrgizilip jatqan qurylys nysandarynyń sapasy men bekitilgen kestege sáıkes aıaqtalýyna basa nazar aýdaryp, baqylaýdy kúsheıtýdi júktedi.
Óz kezeginde qalanyń kúnnen kúnge kórkeıip jatqanyna rıza bolǵan jergilikti turǵyndar oblys basshysyna óz alǵystaryn aıtty. Olar kúlli Qazaqstan qas qaqpaı qarap otyrǵan Túrkistan aımaǵynyń damýyna oblys ákiminiń qosyp jatqan úlesiniń mańyzdy ekenin aıtyp, rızashylyqtaryn bildirdi.
