Ómirzaq Shókeev Túrkistandaǵy iri qurylys alańdaryn aralady
TÚRKІSTAN. QazAqparat – Túrkistan oblysynyń ákimi Ómirzaq Shókeev qala basshysy Rashıd Aıýpovpen jáne jaýapty sala basshylarymen birge Túrkistan qalasyndaǵy qurylys nysandaryn aralap, jumys barysyn baqylady, jaýaptylarǵa birqatar mindetter júktedi, dep habarlaıdy QazAqparat.
Qala ortalyǵyndaǵy abattandyrý jumystary men ashyq aspan astynda ornalasqan basseınniń qurylysyn qarap shyqty. Álemdik standartqa saı salynyp jatqan sporttyq aýmaqtyń aınalasy jasyl jelekke oranbaq.
Oblys basshysy Batys Eýropa – Batys Qytaı halyqaralyq avtodálizimen qaladaǵy Maıkotov kóshesine deıingi avtojoldyń qurylys basynda boldy. Uzyndyǵy 6,5 shaqyrym bolatyn 4 jolaqty jol aldaǵy jyly ashylady. Sondaı-aq, 11 gektar jerge jaıǵasqan «Jelilik saıabaq» jobasynyń qurylysyn baqylaǵan óńir basshysy merdiger kompanııa jetekshilerine birqatar etkertý aıtty. Kógaldandyrý jumystaryna kúsh salyp, qaýipsizdik sharalaryn umyt qaldyrmaýdy eskertti. Jumystardyń sapaly bolýy qajettigine aıryqsha kóńil bólgen aımaq basshysy nysandardyń syrt kelbetindegi sánine de nazar aýdarý kerektigine toqtaldy.
«Túrkistannyń damý baǵyttary oblystyq deńgeımen shektelmeı, kúlli túrki jurtynyń mádenı-rýhanı, tarıhı ortalyǵy retinde júrgizilýi tıis. Halyqtyń qolaıly ómir súrýin qamtamasyz etetin abattandyrylǵan ortalyqtar qalaǵa kórik berip qana qoımaı, turǵyndar úshin tartymdy bolýy asa mańyzdy. Aınala kógaldandyrylyp, gúlzarlarmen kómkerilmek. Egilgen ár taldyń túbine sýarý júıesi engiziledi», – dedi oblys ákimi.
2020 jyly kóne shahardyń rýhanı-mádenı ortalyǵynda birneshe iri nysannyń qurylysy qyrkúıek aıynda tolyq aıaqtalyp, paıdalanýǵa tapsyrylatyn bolady. Ómirzaq Shókeev qazany qaınaǵan qurylys alańdaryn aralap, 3 gektar aýmaqta ornalasqan kórermen zaly 510 adamǵa arnalǵan drama teatr men ǵylymı-ámbebap kitaphanasynyń jáne «Hampton by Hilton» qonaq úıiniń qurylysyn tekserdi. Tórt qabattan turatyn zamanaýı úlgide boı kótergen mádenı oshaqtyń jalpy kólemi 10 000 sharshy metrdi quraıdy. Otyrar yqshamaýdanynda salynyp jatqan kitaphana 1 ga aýmaqqa jaıǵasqan. Kógaldandyrylǵan aýmaǵy men keń parkıngi bar úsh qabatty biregeı keshenniń úlken syrtqy arkasy shyǵys saraılary men qalanyń tarıhı murasyn eske túsiredi. Torly jarmalar Eýropa elderindegi álem astanalarynyń kitaphanalarynyń jarqyn mysaldaryn boıyna sińirgen. Munda baǵaly kitaptardy saqtaýǵa ońtaıly mıkroklımat jasaý úshin avtonomdy qazandyq qarastyrylǵan.
Bul nysandar jaqsy fýnktsıonaldylyǵymen, syıymdylyǵymen erekshelenedi jáne sáýlet óneriniń qazirgi standarttaryna saı keledi. Salynyp jatqan nysandardy tekserýdi aıaqtaǵan soń, oblys basshysy qurylys jumystaryn kúsheıtýdi jáne qajet bolǵan jaǵdaıda qurylysshylardy qosymsha tartýdy tapsyrdy.
