Ómirzaq Shókeev Túrkistan oblysynyń ár aýdanyna 1 mlrd teńgeden bólmek
TÚRKІSTAN. QazAqparat - Túrkistan oblysynyń qalalary men aýdandaryna 1 mlrd teńgeden qarjy bólinedi. Bul qarajat halyqqa bıyl paıdasy tıetin, nátıjesi kózge kórinetin, jyldar boıy sheshimin tappaǵan máselelerdi sheshýge jumsalýy kerek. Bul týraly oblystyq máslıhattyń kezekti sessııasynda aımaq basshysy Ómirzaq Shókeev aıtty, dep habarlaıdy QazAqparat.
Oblys ákimi bul bastama aýdandardaǵy qordalanǵan ózekti máselelerdiń sheshimin tabýǵa oń septigin tıgizetinin aıtady.
«Túrkistan oblysynyń aýdandary men eldi mekenderin damytý boıynsha jumystar júrgizilýi qajet. Eldi mekenderdiń máselelerin júıeli túrde sheshýimiz kerek. Osyǵan oraı, aýdandardy qoldaý maqsatynda aldaǵy úsh jylda jyl saıyn 1 mlrd teńgeden qarjy bólinedi. Bul qarajatty durys baǵytta jumsap, ıgergen aýdanǵa keıingi jyly 2 mlrd teńgeden beriledi. Al ıgere almaǵan aýdandardyń qarajaty kerisinshe, qysqaryp otyrady. Osy arqyly aýdanda atqarylǵan jumys nátıjesin ańǵarýǵa bolady», - dedi Ómirzaq Shókeev.
Sondaı-aq óńir basshysy oblys bıýdjetiniń kiris bóliginiń tym azdyǵyn synǵa alyp, ony eki esege ulǵaıtý josparlanǵanyn atap ótti.
«Bıýdjettiń kiris bóligine qatysty aıtar bolsam, oblys tek 53 mlrd teńge ǵana kiris tabýda. Meniń oıymsha, oblys kirisin 100 mlrd teńgege deıin, ıaǵnı 2 esege ulǵaıtýǵa qabiletimiz jetedi. Sondyqtan da bıýdjettiń kiris bóligin ulǵaıtý jónindegi jumysty josparly túrde júrgizý qajet. Sondaı-aq respýblıkalyq bıýdjet qarajaty qaralǵan oblystyń Keshendi damý josparyn qaıta qarap shyǵý kerek», - dedi ol.
