Ómirzaq Shókeev: Túrkistan oblysynyń áleýmettik-ekonomıkalyq damý kórsetkishi oń sıpatqa ıe

TÚRKІSTAN. QazAqparat - Búgin Túrkistan oblystyq máslıhatynyń kezekti elý ekinshi sessııasy ótti. Kún tártibinde 6 másele qaralǵan sessııa jumysyna oblys ákimi Ómirzaq Shókeev, oblys ákimdiginiń músheleri, oblystyq saılaý komıssııasynyń tóraǵasy, memlekettik organ basshylary men qala, aýdan ákimderi jáne máslıhat hatshylary, sondaı-aq buqaralyq aqparat quraldarynyń ókilderi qatysty, dep habarlaıdy QazAqparat óńir basshysynyń baspasóz qyzmetine silteme jasap.

Ómirzaq Shókeev jıynda oblystyń áleýmettik-ekonomıkalyq damýy boıynsha 2020 jyldyń 7 aıynda atqarylǵan jumystary týraly baıandady.

«Jyl basynan beri oblysymyz kúrdeli jaǵdaıda damyp keledi. Oǵan qaramastan, bıylǵy jyldyń 7 aıynda oblystyń mańyzdy áleýmettik-ekonomıkalyq damý kórsetkishteri oń sıpatqa ıe bolyp otyr. Ekonomıkanyń basty kórsetkishi sanalatyn jalpy óńirlik ónim kólemi byltyrǵy jylmen salystyrǵanda 6 paıyzǵa artqan. Ósim qarqyny osy deńgeıde saqtalady dep josparlanýda», – dedi Ómirzaq Estaıuly.

Óńirde 3000-nan astam jumys ornyn ashýǵa múmkindik beretin 53 joba júzege asyrylýda. Onyń ishinde 33 joba iske asyrylyp, qazirgi tańda 750 jumys orny ashylǵan. Nátıjesinde oblysta ónerkásip ónimi de artyp keledi. Óńirdiń ınvestıtsııalyq ahýalyn jaqsartý maqsatynda, oblysta sondaı-aq 9 ındýstrıaldyq aımaq qurylǵan. Onyń ishinde 7 ındýstrıaldyq aımaqqa ınfraqurylym tartylǵan. Oblystyń barlyq baǵyttaǵy damý qarqynyna jeke-jeke toqtalyp, baıandama jasaǵan aımaq basshysy óńirde kásipkerliktiń de óte jaqsy damyp kele jatqandyǵyn atap ótti. Búginde oblysta 142 myńnan astam shaǵyn jáne orta bıznes sýbektileri bar. Kásipkerliktiń damýy jaǵynan Túrkistan oblysy respýblıka kóleminde birinshi orynǵa ıe.

Oblys ákiminiń aıtýynsha, bul tusta «Qarapaıym zattar ekonomıkasy» baǵdarlamasy úlken qolǵabys bolyp otyr. Óńirde 447 áleýetti jobalar daıyndalyp, respýblıkalyq komıssııa qaraýyna joldanǵan. Onyń ishinen 26 mıllıardtan astam teńgeni quraıtyn 221 joba qarjy ınstıtýttarymen qarjylandyrylýda.

«Memleket basshysynyń «Jańa jaǵdaıdaǵy Qazaqstan: is-qımyl kezeńi» atty halyqqa arnaǵan joldaýynda aıtylǵan aýqymdy máselelerdiń barlyǵy elimizdiń ekonomıkalyq ósimi men turmystyq ál-aýqatynyń jaqsarýyna baǵyttalǵan. Osy oraıda, búgingi tańda QR Úkimeti tarapynan bekitilgen Jalpyulttyq is-shara jospary basshylyqqa alyna otyryp, Túrkistan oblysynda is-shara jospary ázirlenýde. Joldaýda kórsetilgen barlyq tapsyrmalar júıeli túrde oryndalatyn bolady», – dedi Ómirzaq Estaıuly.

Kúrdeli kezeńde oblysty damytyp, kórkeıtý jumystary toqtamaq emes. Máslıhat sessııasynda óńirde aldaǵy ýaqytta atqarylýy tıis aýqymdy sharalar barysy aıtylyp, tyń serpin berer sheshimder qabyldandy.