Ómirzaq Shókeev Túrkistan qalasynyń ıfraqurylymyn damytýdy júktedi
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistan qalasyn aralap, Bas josparǵa sáıkes birqatar tapsyrmalar júktedi, dep habarlaıdy QazAqparat.
«Túrkistan oblysynyń ákimi Ómirzaq Shókeev oblys ortalyǵy turǵyndarynyń ómir súrý sapasyn jaqsartýdyń negizgi joly retinde ınfraqurylymdy damytýǵa erekshe mán berýde. Osy oraıda, óńir basshysy jaýapty sala jetekshilerimen birge oblys ortalyǵyn aralap, qalanyń Bas josparyna sáıkes atqarylyp jatqan jumystardy pysyqtap, tıisti sala basshylaryna birqatar naqty tapsyrmalar berdi. Shahardaǵy jol jóndeý, gaz, aýyzsý men káriz júıesin júrgizý jumystaryn kózben kórgen aımaq basshysy tıisti sala jetekshilerinen qurylystyń kestege sáıkes belgilengen merziminde aıaqtalýyn talap etti», - delingen oblys ákimdiginiń aqparatynda.
Bıyl qala joldaryn jóndeý úshin ákimshilik-iskerlik ortalyǵyna irgeles ornalasqan, ıaǵnı ınfraqurylymy tolyq aıaqtalǵan jerlerde uzyndyǵy 100 shaqyrym bolatyn 81 kóshege ortasha jóndeý jumystaryn júrgizý josparlanǵan.
«Jańa kóshelerde sarqyndy sý júıesine arnalǵan fýtlıar ornatý, jol negizin daıarlaý, trotýarlardyń jıektastaryn ornatý jumystary júrgizilýde. Sonymen qatar, qazirgi ýaqytta Batys Eýropa-Batys Qytaı avtojolynan Maıkótov kóshesine deıingi avtojol qurylysy júrip jatyr. Jańa jol tóselip, aınalasynda aryq-atyzdar, trotýarlar men velojoldyń jıektastary ornatylǵan. Budan bólek, qala aýmaǵynda «Jasyl beldeý» qalyptastyrý boıynsha bıyl 100 gektar jerge Temir jol boıynyń oń jaǵalaýy men Arys-Túrkistan arnasynyń aınalasyn jasyl jelekke oraý josparlanǵan. Sonymen qatar, qala aýmaǵynda jańa jobaǵa sáıkes Nıý-Iork satysyn ornatý, B.Sattarhanov dańǵylynda tireý beketin ornatý, Qyzylorda tasjoly boıynda alleıa alańy men Temir jol vokzalynyń aldyna tas tósep, «Jeńis» saıabaǵynan ortalyq bazarǵa baratyn joldy abattandyrý jumystary bastaldy. Arys-Túrkistan arnasynan bastaý alatyn birneshe ırrıgatsııalyq kanaldyń qurylysyn mamyr aıynda tolyq aıaqtap, paıdalanýǵa tapsyrý josparlanýda», - dedi vedomstvodan.
Málim etilgendeı, búginde Túrkistan qalasynda 52 myńnan astam abonent bar bolsa, onyń 65% gaz qubyrlary tartylǵan. Turǵyndardy tabıǵı gazben qamtamasyz etý jumystary jalǵasýda. Magıstraldy gaz qubyrynda qurylys-montajdaý jumystary júrgizilip jatyr. 28,4 shaqyrym gaz qubyry tartylyp, gaz rettegish jáshigi ornatylýda. Bıyl bıýdjetten qaralǵan qarjyǵa 25 nysannyń qurylys jumystaryn júrgizip, jyl sońyna deıin Túrkistan qalasyn gazben tolyǵymen qamtý kózdelip otyr.
Sondaı-aq nebári 16% káriz júıesimen qamtylǵan Túrkistan qalasynyń ekologııalyq jaǵdaıyn jaqsartý maqsatynda jan-jaqty taldaý jumystary júrgizilgen. Nátıjesinde qalany 2021 jylǵa deıin 100% káriz júıesimen qamtamasyz etetin 10 nysannyń jobasy ázirlenip, keshendi josparǵa engizilgen.
