Ómirzaq Shókeev Tólebı aýdanyndaǵy jańa jobalarmen tanysty
TÓLEBI. QazAqparat – Túrkistan oblysynyń ákimi Ómirzaq Shókeev jumys saparymen Tólebı aýdanyna baryp, ondaǵy ónerkásip salasyndaǵy iri jobalardyń biri «Lengir mashına jasaý zaýytynda» boldy. Munda mashına jasaý ónerkásibine qajetti qurylys, temir ónimderi men bólshekteri shyǵarylmaq, dep habarlaıdy QazAqparat tilshisi.
Atalǵan zaýyt tapsyrys bolǵan jaǵdaıda tipti poıyz vagondary men bólshekterin jasap shyǵara alady. Bul jobaǵa 3-3,5 mlrd teńge ınvestıtsııa tartylmaq. Jalpy óndiristik aýmaǵy 13 myń sharshy metrden asatyn kásiporynda tolyqtaı qaıta qurý men jańartý jumystary júrgizilip jatyr. Munda otandyq shıkizat paıdalanylyp, óndirilgen ónimderdi elimizdiń ishki naryǵyna shyǵarý josparlanýda. Aldaǵy ýaqytta jańa jumys oryndary ashylyp, 150 adamdy jumyspen qamtý kózdelgen. Toqyraý kezinde qaraýsyz qalǵan mashına jasaý zaýyty qaıta jandanyp, bıyl iske qosylady dep josparlanǵan.
Aımaq basshysy sondaı-aq, «Jumyspen qamtý jol kartasy» baǵdarlamasy aıasynda júzege asyrylatyn jobalarmen de tanysty. Aýdan ortalyǵyndaǵy «Jastyq» stadıonynda kúrdeli jóndeý jumystary júrip jatyr. Aýdanda búginde bilim uıalary jańartylyp, 20 páterli 9 turǵyn úı boı kótergen. Oblys basshysyn Abaı Qunanbaıulynyń 175 jyldyq mereıtoıy oraı Tólebı aýdanynyń ortalyǵynda ornatylatyn eskertkish jobasymen tanystyrdy. Bıiktigi 3,5 metr mystan quıylǵan eskertkish demeýshiler tarapynan júzege asýda. Uly oıshyldyń músini jańadan boı kóteretin Abaı alleıasynda ornatylmaq. Budan ózge, aýdanda demeýshiler esebinen tarıhı tulǵa Tóle bıdiń 7 metrge jetetin eńseli eskertkishi boı kótermek. Baba músini Tólebı aýdanynyń eń kórikti jerleriniń birine aınalmaq.
Ómirzaq Estaıuly Kóksáıek eldi mekenindegi jeke sharýa qojalyǵynyń jumysymen de tanysty. Naýryz aıynda iske qosylǵan qojalyqta 4 ga jerge qyzanaq, qııar, sábiz, qulpynaı, bolgar buryshy syndy kókónister egilgen. Jalpy aýdan kóleminde tamshylatyp sýǵarý tehnologııasymen qarqyndy jemis-jıdektiń kólemi 35 gektarǵa jáne sýarmaly jerdiń kólemi 80 ga artyp, jańa 4 aýylsharýashylyq tehnıkasy alynǵan.
