Ómirzaq Shókeev: Tólebı aýdanyndaǵy sel saldary tolyq joıylady
TÓLEBI. QazAqparat – Túrkistan oblysynyń ákimi Ómirzaq Shókeev Tólebı aýdanyna baryp, sel alǵan úılerdi aralap kórdi. Taýly aýdanda qatty jaýǵan nóserden ózen sýy arnasynan asyp, birneshe kóshelerdi sý shaıǵan bolatyn, dep habarlaıdy QazAqparat tilshisi.
Ómirzaq Shókeev selden japa shekken turǵyndardyń kókeıindegi máselelerdi ońtaıly sheshý maqsatynda olarmen kezdesip, sý shaıǵan jerlerge baqylaý júrgizdi. Munda tabıǵattyń tosyn minez tanytýyna qarsy sharalar meılinshe kúsheıtilgen. Aýdan ákimi Baýyrjan Omarbekovtiń tóraǵalyǵymen tasqyn zardaptaryn joıý jónindegi qurylǵan jedel shtab jumys qurylyp, 300-den astam azamattan qurylǵan jumysshy top tynymsyz jumys isteýde. Sý shaıǵan úıde bolǵan oblys basshysy nóserden kelgen qaýipti, ıaǵnı, Lengir ózeniniń arnasynan asýynan oryn alǵan jaıttyń zalaldaryn tolyqtaı joıýdy tapsyrdy.
«Nóser jaýynnan Leńgir ózeninde sý deńgeıiniń joǵarlaýyna baılanysty ishinara sý basýy oryn alǵany belgili. Sel saldary tolyq joıylady. Ol úshin barlyq qajetti jumystar jasalyp jatyr. Sel aǵynynan adamdar aman. Bul eń bastysy. Mal shyǵyny joq. Sý kelgen úıler tolyq jóndelip, aınalasyna qorshaýlar qoıylady»,-dedi Ómirzaq Estaıuly.
Sala mamandardyń aıtýynsha, ózen sýynyń arnasynan asyp ketýine qoqys qaldyqtary birden bir sebep bolǵan. Ákimdikpen jasalyp jatqan jumystar júıeli júrgizilse de, turǵyndardyń tikeleı jaýapkershiligindegi tazalyq sharalary jasalmaǵan. Búginde selden kelgen qaýipti joıý maqsatynda aýdan ákimdigi, tótenshe jaǵdaılar qyzmeti men eldi meken turǵyndary arnalardy tazartyp jatyr. Bul jumystarǵa 126 qyzmetker, 31 arnaıy tehnıka, 14 motopompa jumyldyrylǵan. Kórshiles Saıram, Túlkibas aýdany Tótenshe jaǵdaılar bóliminiń qyzmetkerleri kómekke kelgen.
Aıta keteıik, 6 mamyr kúni qatty jaýǵan nóserli jaýyn-shashyn saldarynan Leńgir qalasyndaǵy Leńgir ózeniniń deńgeıi óziniń sýdy ótkizý múmkindiginen úsh ese kóterilgen. Sý basýdyń saldarynan qulaǵan nemese buzylǵan qurylys nysandary joq. Ózen jaǵalaýy boıyndaǵy 2 turǵyn úıdiń aýlalary men qoralaryna sý kirip, 6 saraı men 16 aýla, bir monsha men jazǵy ashanany sý shaıyp ótken bolatyn. Sonymen qatar, ózen boıyndaǵy Jańauıym eldi mekenindegi birneshe kóshedegi gaz qubyryna zaqym kelýine baılanysty 121 turǵyn úı gaz júıesinen ýaqytsha ajyratylǵan. «Kókterek» sý jınaý ımaratynyń jumysy toqtatylyp, Leńgir qalasynyń shyǵys bóligindegi 3 myńnan astam úı uńǵymalar arqyly ýaqytsha aýyz sýmen qamtamasyz etilýde. Keltirilgen zalaldardy qalpyna keltirý jumystary jalǵasyp jatyr.
