Ómirzaq Shókeev soǵys ardagerlerin quttyqtady

TÚRKІSTAN. QazAqparat - Uly Jeńistiń 74 jyldyǵy merekesi qarsańynda Túrkistan oblysynyń ákimi Ómirzaq Shókeev UOS ardagerlerin arnaıy shańyraqtaryna baryp quttyqtady. Bul týraly oblys ákiminiń baspasóz qyzmetine silteme jasap QazAqparat habarlaıdy.

Óńir basshysy áýeli Uly Otan soǵys ardageri Ábjappar Daırabaıulynyń shańyraǵyna aıaldady. Ol 1927 jyly 1 qańtarda Syr boıyndaǵy Tartoǵaıda dúnıege kelgen. 1943 jyly maıdanǵa alynyp, Belarýs, Ýkraına maıdandarynda Polshany azat etýge qatysqan. «Uly Otan soǵysy» ordenimen, «Eren eńbegi úshin» medalimen marapattalǵan. Elge oralǵan soń ustazdyq jolda eńbek etken. Ardager 3 qyz ben 2 uldan 6 nemere tárbıelep otyr.

Keıin oblys ákimi Uly Otan soǵys ardageri Nemet Abdrasılovtyń shańyraǵynda boldy. Ol 1922 jyly 1 qańtarda Túrkistan qalasynda dúnıege kelip, 1-gvardııalyq artıllerııalyq dıvızııa quramynda nysanashy, zeńbirek komandıri bolǵan. Ýkraına, Belarýs maıdandary men Stalıngrad, Kýrsk shaıqastaryna qatysqan. І dárejeli Otan soǵysy, ІІ jáne ІІІ dárejeli Dańq ordenderimen, eki Qyzyl Juldyz ordenimen, «Germanııany jeńgeni úshin», «Berlındi alǵany úshin», «Varshavany azat etkeni úshin» syndy medaldarmen marapattalǵan. Ardager 5 ul men 1 qyzdan 20 nemere, 18 shóbere súıip otyr.

Oblys ákimi Ómirzaq Estaıuly ardagerlerdiń soǵysta kórsetken erligi búgingi urpaqtyń qamy úshin jasalǵanyn aıtyp, aıtýly merekemen quttyqtap, syı-syıapat jasady. Batyrlarǵa denniń saýlyǵyn, ǵumyrdyń uzaqtyǵyn tiledi.

Aıta keterligi, Túrkistan oblysy boıynsha Uly Otan soǵysy ardagerleri jáne olarǵa teńestirilgender sany - 12 849, sonyń ishinde 63-i - soǵysqa qatysýshylar men múgedekter, 3-eýi - qaza tapqan jaýyngerlerdiń jubaıy jáne 9445 tyl ardageri bar.

Mereke qarsańynda barlyq aýdandar men qalalarda jergilikti bıýdjet esebinen Uly Otan soǵysyna qatysýshylarǵa 100 aılyq eseptik kórsetkish mólsherinde, ıaǵnı 252 500 teńgeden, olarǵa teńestirilgen azamattarǵa 5 AEK (12 625 teńge) mólsherinde birjolǵy materıaldyq kómek beriledi.