Ómirzaq Shókeev Shymkentte Túrkistan oblysynyń turǵyndaryn qabyldady
Túrkistan oblysynyń ákimi Ómirzaq Shókeev oblys ortalyǵynan shalǵaı aýmaqta ornalasqan aýdan turǵyndarymen júzdesý úshin Shymkent qalasyna arnaıy bardy. Aımaq basshysy halyqtyń muńyn tyńdap, zań aıasynda jaýap berdi. Azamattardyń máselelerine muqııat nazar salǵan Ómirzaq Estaıuly olarǵa tyǵyryqtan shyǵý joldardyń tártibin túsindirdi.
Kókeıtesti máselesin oblys ákiminiń aldynda aqtarǵan birneshe turǵynnyń biri tólebılik Urzııa Sergebaeva ómir boıy baspana taýqymetin tartyp keledi eken. Jaldamaly páterdi panalap keletin bes balaly jalǵyzbasty ana turaqty baspana surady. 1,5 mln teńge kóleminde ataýly áleýmettik kómek alǵan áıel, aǵylshyn jáne arab tilderinen aqyly sabaq berýmen aınalysady. Oblys basshysy aýdan ákimdigine qabyldaýǵa kelgen ananyń ótinishin sheshýdi tapsyrdy.
Baspana taýqymetin tartqan taǵy bir kópbalaly ana – Jazıra Turǵynova. 1991 jyly týǵan 7 balanyń anasyna ákimdik demeýshilerdiń kómegimen Lengir qalasynan 8,5 mln teńgege 5 bólmeli, tolyq jıǵaz-jabdyqtarmen qamtylǵan jeke úı satyp alyp bergen. Otaǵasyna birneshe jerden jumys ta usynylypty. Degenmen kópbalaly ana úıiniń qazir apatty jaǵdaıda ekenin aıtyp shaǵymdandy. Ómirzaq Estaıuly otbasynyń turmysyn arnaıy komıssııa tekserip, qajet bolsa demeýshiler esebinen «Qamqorlyq» jobasy aıasynda kómek kórsetiletinin aıtty.
Oblys basshysynyń jeke qabyldaýyna kelgen Ońlasyn Nazarov Maqtaaral aýdany, Myrzatóbe eldi mekeninen balabaqsha ashyp, sport keshenin salýdy jáne eldi mekendi tabıǵı gazben qamtý ótinishin jetkizdi. Ómirzaq Shókeev aýyldaǵy «Mahambet Ótemisuly» atyndaǵy №28 jalpy orta mektebiniń eski ǵımaratyn kúrdeli jóndeýden ótkizip, balabaqsha ashýdy, 2020 jyly jergilikti ákimdiktiń bıýdjet esebinen sporttyq alańsha salýdy jáne aýyldy kógildir otynmen qamtýdy qolǵa alýdy tapsyrdy.
Ákim qabyldaýynda bolǵan Ermahan Kýskeev ıAsaýı men Arystan bab keseneleri aralyǵyndaǵy atyrapqa túrki elderindegi eń ozyq mádenı muralardyń jıyntyǵyn jasaqtaý josparymen tanystyrdy.
Ómirzaq Estaıuly quzyrly basqarma basshylaryna usynystardy qarastyryp, taldaý jasaýdy tapsyrdy.
Oblys ákiminiń jeke qabyldaýyna kelgender jeke bastaryna qatysty jáne óńirge ortaq áleýmettik problemalardy aıtyp bólisti. Ómirzaq Estaıuly tıisti salaǵa qatysty saýaldardy baqylaýǵa alyp, olardy sheshýdi aýdan ákimderi men basqarma basshylaryna júktedi.
