Ómirzaq Shókeev sel saldaryn joıý jumystaryn tekserdi
NUR-SULTAN. QazAqparat - Túrkistan oblysynyń ákimi Ómirzaq Shókeev Tólebı aýdanyn aralap, nóserli jaýynnan zardap shekken nysandardy retke keltirý jumystaryn tekserdi, dep habarlaıdy oblystyq ákimdiktiń baspasóz qyzmeti.
Tólebı aýdanynda jergilikti aýqymdaǵy tabıǵı sıpattaǵy tótenshe jaǵdaı jarııalanyp, arnaıy komıssııa jumys isteýde. Oblys ákiminiń orynbasary M.Myrzalıev tóraǵalyq etetin tótenshe jaǵdaı boıynsha shtab qurylyp, sý basqan eldi mekenderde tıisti jumystardy atqarý úshin 4 sektor belgilengen bolatyn. Ár sektorǵa jaýapty bolyp Qazyǵurt, Ordabasy, Saıram, Tólebı aýdandarynyń ákimderi bekitilgen.
Oryn alǵan jaǵdaıdy retke keltirý maqsatynda búgingi tańǵa 293 adam, 27 motopompa, 38 tehnıka jumyldyrylǵan. Keltirilgen zalal shyǵyndaryn anyqtaý jumystary júrgizilýde. Qazirgi ýaqytta selden japa shekken 30 astam úı anyqtalyp, olar qaıta salynatyn bolady.
Sondaı-aq, nóser jaýynnyń saldarynan Joǵarǵy Qasqasý eldi mekenindegi «Qasqasý» ózeni boıynda ornalasqan 4 kópirdi sý shaıyp ketken bolatyn. Qazirgi tańda jobalyq quny 82,8 mln. tg quraıtyn 4 kópirdiń smetalyq qujattamalary ázirlengen.
Joǵarǵy Qasqasý eldi mekeninde 44 abonent aýyz sýdan ýaqytsha ajyratylǵan bolatyn. Aýdan ákimdigi tarapynan shuǵyl qalpyna keltirý sharalary qabyldanyp, atalǵan abonentterge aýyz sý 15.05.2020 jyl saǵat 19.00-ge deıin qosyldy.
Barlyq atqarylyp jatqan jumystarmen tanysqan oblys ákimi shtab jumysyna joǵary baǵa berdi.
Sý tasqynynan zardap shekken eldi mekenderde elektr energııasy jáne tabıǵı gazben qamtý jaǵdaıy turaqty ekendigine kóz jetkizdi.
Esterińizge sala keteıik, nóser jaýynnyń saldarynan Tólebı aýdanyndaǵy ózenderdiń sý deńgeıi kóterilip, aryq-atyz, qyr-saılardan jınalyp aqqan jańbyr sýynan 6 eldi mekendegi 250 turǵyn úılerdiń aýlasyna, onyń ishinde 76 úıge sý kirgen bolatyn.
