Ómirzaq Shókeev Saıram aýdanynda et saýdasyn retke keltirýdi tapsyrdy
TÚRKІSTAN. QazAqparat – Túrkistan oblysynyń ákimi Ómirzaq Shókeev Saıram aýdanyndaǵy jabaıy saýda oryndary men olardyń salyq tóleý tártibin retke keltirýdi tapsyrdy, dep habarlaıdy QazAqparat.
«Ásirese, et saýdasymen aınalysatyn iri saýdagerlerdiń salyqtan jaltaryp ne salyqtyń jeńildetilgen túrimen qutylyp júrgenderin anyqtap, tıisti shara qabyldaýdy mindettedi. Saıram aýdanynyń ákimi Ulasbek Sádibekovtiń ótken jyldyń qorytyndysy boıynsha esebin tyńdaǵan aımaq basshysy bul máselege qatysty jaýapty sala jetekshilerine naqty mindetter júktedi», - dedi óńir ákimdiginen.
Sonymen qatar, Ómirzaq Shókeev Saıram aýdany men Shymkent qalasynyń arasyndaǵy tasjoldyń qurylysyna qatysty máseleni qysqa ýaqytta sheshýdi tapsyrdy. Bıyl Saıram aýdanynda aýyzsýmen jáne gazben qamtamasyz etý 100% ortalyqtandyrylmaq. Sondaı-aq, «Eńbek» baǵdarlamasy men óńirde bastaý alǵan «Qamqorlyq» jańa jobasy boıynsha nátıjeli jumystar atqarylǵan.
Jyldyq esepten soń aımaq basshysy Saıram aýdanynyń turǵyny Álibek Baınazar aqsaqaldy qabyldady. Ardager oblys ákiminen tozyǵy jetken oblystyq mańyzy bar «Kóksáıek – Aqsý – Shaıan – Myńbulaq» avtojolyn jóndeýdi qolǵa alýdy surady. Kólik qarqyndylyǵy joǵary tasjol birneshe aýyldan ótedi. Oblys basshysy atalǵan joldyń respýblıkalyq bıýdjetten qarjylandyrylatynyn aıtyp, máseleniń aldaǵy aqpan aıynda sheshimin tabatynyn atap ótti.
