Ómirzaq Shókeev otandyq ónimderdi paıdalanýǵa shaqyrdy
Óńir basshysy aımaqta ornalasqan sýsyn óndiretin Kórik JShS-na baryp, alkogolsiz tabıǵı shyryndy sýsyndar shyǵaratyn kásiporyndy aralap kórdi. 2017 jyldan bastap jumys isteıtin tsehta táýligine 8 tonna sýsyn shyǵarylady. 21 adam turaqty jumyspen qamtylǵan. Ómirzaq Shókeev bul kúni Sharaphana aýyl okrýginde ornalasqan «Qazyǵurt Nury» JShS-niń jylyjaıynda da boldy. Jalpy aımaǵy 2,9 gektardy quraıtyn qyzanaq pen qııar ósiretin sharýashylyqty aralady. Seriktestik tóraǵasy Amanjol Áshirbaevtyń aıtýynsha, jylyjaıdan ótken jyly jalpy 340 tonna ónim alynǵan. Aldaǵy ýaqytta ónim kólemin ulǵaıtý josparlanýda. Sharýashylyq jumysymen tanysqan óńir basshysy sharýalarǵa jylyjaı keshenine qajetti jabdyqtardy otandyq óndirýshilerden alý qajettigin aıtty.
Sondaı-aq, oblys ákimi 70 gektar jerge qarqyndy baý sharýashylyǵyn damytyp otyrǵan «Birlik» AÓK óndiristik kooperatıviniń jumysyn da aralap kórdi. Onda qazir almanyń «Golden», «Delıshes», «Red Delıshes», «Gala Fýdjı», «Grenı», «Smıt» syndy túrleri ósedi. Aımaq basshysy alma baý kólemin ulǵaıtý maqsatynda qojalyq ıesine Túrkistan qalasynan jer telimi beriletinin aıtty. Sondaı-aq, qarqyndy baý kólemin kóbeıtýde aýdan basshylyǵyna kásipkerler úshin memlekettik qoldaý men jer máselelerin der kezinde sheshý qajettigin tapsyrdy.
Budan basqa, «Qaıyp ata» JShS qojalyǵynyń jumys barysymen tanysqan óńir basshysy shetelge et ónimin eksporttaý úshin qojalyqty arnaıy reestr tizimine qosyp, qoldaý kórsetiletinin jetkizdi. Seriktestiktiń mal bordaqylaý kesheni Qazyǵurt aýdanyndaǵy Jańabazar aýylynda ornalasqan. Munda búginde 5 myńǵa jýyq iri qara bordaqylanýda. Ósiriletin tórt túliktiń eti ekologııalyq jaǵynan taza ári sapaly bolǵandyqtan suranys óte joǵary. Sondyqtan seriktestik et óndirip qana qoımaı, ony shet elderge eksporttaý jumysyn da qolǵa alǵan.
