Ómirzaq Shókeev óńirlik jedel járdem qyzmetine 32 kóliktiń kiltin tabys etti
TÚRKІSTAN. QazAqparat - Túrkistan oblysynyń ákimi Ómirzaq Shókeev óńirlik jedel járdem qyzmetine 32 kóliktiń kiltin tabys etti, dep habarlaıdy QazAqparat oblys ákiminiń baspasóz qyzmetine silteme jasap.
Ómirzaq Shókeev aýdandyq jáne qalalyq aýrýhanalar men emhanalarǵa 32 medıtsınalyq jedel járdem kóliginiń kiltin tabystady. Jańa avtokólikter naýqasqa alǵashqy kómek kórsetýge arnalǵan qajetti quralmen tolyq qamtamasyz etilgen. Saltanatty sharada óńir basshysy elimizde densaýlyq saqtaý salasyna erekshe kóńil bólip otyrǵanyn atap ótti.
«Bizdiń eń basty baılyǵymyz – halyqtyń densaýlyǵy. Bul tusta, medıtsınanyń eń mańyzdy baǵyty – jedel járdem kórsetý salasy ekeni belgili. Oblystaǵy medıtsına salasyn damytý - basty nazarda. Bul rette osy salany zamanaýı, tolyq jabdyqtalǵan arnaıy jedel járdem kólikterimen qamtamasyz etý isin áli de jalǵastyramyz. Mundaı kóliktermen aldaǵy ýaqytta barlyq aýdandardy tolyq qamtamasyz etetin bolamyz. Bul múmkindik - turǵyndardyń ómir súrý uzaqtyǵynyń ósýine jáne medıtsınalyq tehnologııalardyń damýyna alǵashqy medıtsınalyq-sanıtarııalyq kómekti damytý baǵytyna óz septigin tıgızedi degen senimdemiz», - dedi Ómirzaq Shókeev.
Kelesi jyly respýblıkalyq bıýdjet qarajaty esebinen qosymsha 60 sanıtarlyq avtokólikpen jabdyqtaý josparlanyp otyr. Qazirgi tańda, Kentaý, Jetisaı, Maqtaaral, Saıram aýdany men Túrkistan qalasynda jalpy 8 densaýlyq saqtaý nysanynyń qurylysy júrgizilýde.
Odan bólek, shalǵaı eldi mekenderde 19 modýldik medıtsınalyq beketi ashylmaq. Halyqtyń saýlyǵy úshin oblysymyzdaǵy medıtsınalyq uıymdardyń materıaldy – tehnıkalyq bazasy da zamanaýı qural-jabdyqtarmen qamtylyp keledi.
