Ómirzaq Shókeev OQO-da aýyl sharýashylyǵy jerleri máselelerine arnalǵan jıyn ótkizdi
ShYMKENT. QazAqparat - Búgin Ońtústik Qazaqstan oblysy ákimdiginde QR Úkimet basshysynyń orynbasary, Aýyl sharýashylyǵy mınıstri Ómirzaq Shókeevtiń tóraǵalyǵymen alqaly jıyn ótti. Májiliste óńirdegi aýyl sharýashylyǵy jerlerin sýarý jáne shegirtke zııankesterinen qorǵaý máseleleri qaraldy, dep habarlaıdy QazAqparat tilshisi.
Basqosýǵa oblys ákimi Janseıit Túımebaev pen QR Aýyl sharýashylyǵy vıtse-mınıstri Gýlmıra Isaeva jáne mınıstrliktiń komıtet tóraǵalary men Jambyl, Almaty, Qyzylorda, Shyǵys jáne Ońtústik Qazaqstan oblystarynyń aýmaqtyq ınspektsııa basshylary, jergilikti sharýa qojalyq ıeleri qatysty. Jıynda alǵashqy bolyp sóz alǵan Ómirzaq Estaıuly Qazaqstannyń geografııalyq ornalasý erekshelikterine qaraı melıoratsııalaý máselesi birinshi kezekte ońtústik óńirlerde ózekti ekendigin jetkizdi.
«2017-2021 jyldarǵa arnalǵan agroónerkásiptiń keshendi damytý baǵdarlamasynda Aýyl sharýashylyǵy mınıstrligi aýyl sharýashylyǵy daqyldarynan joǵary jáne turaqty ónim alý úshin jer jáne sý resýrstaryn paıdalanýdy arttyrý maqsatynda túrli sharalar keshenin usyndy. Atap aıtqanda, gıdrologııa, topyraq jáne agroklımattyq jaǵdaılaryn jaqsartý», - dedi Ómirzaq Shókeev.
Sonymen qatar, májiliste melıoratsııa júıesiniń memlekettik baǵdarlama aıasynda iske asyrylýy jáne Elbasynyń tapsyrmasy aıasynda ırrıgatsııa júıesin qalpyna keltirý jáne 600 myń gektar sýarmaly jerdi aınalymǵa engizý boıynsha óńirde aldaǵy ýaqytta atqarylatyn sharalar sóz boldy.
Oblys ákimi Janseıit Qanseıituly aımaqtaǵy sýarmaly jerler kólemi ulǵaıtylyp, jańa baǵyttaǵy jobalar boıynsha damytylyp jatqandyǵyn jetkizdi. Aıtalyq, óńirde ótken jyly 570,4 myń gektar sýarmaly jerdiń 498,2 myń gektary paıdalanylǵan.
Sondaı-aq, byltyr óńirdegi aýyl sharýashylyǵy salasyndaǵy jalpy ónim kólemi 522,4 mlrd. teńgeni qurap, ótken jyldyń tıisti kezeńimen salystyrǵanda 42 mlrd. teńgege artqan. Sondaı-aq ozyq tehnologııalardy qoldanýda Ońtústik Qazaqstan oblysy respýblıkada kósh bastap tur. Elbasymyzdyń tapsyrmasyna sáıkes, aımaqta aýyl sharýashylyǵy ónimderin eksporttaý jyldan jylǵa qarqyndy ósýde.
Basqosý barysynda jergilikti sharýa qojalyqtarynyń usynystary tyńdaldy. Sharýalar maýsymda túrli tyńaıtqyshtardyń baǵasyn baqylaýǵa alý kerektigin jáne ozyq tehnologııalarǵa saı alynatyn jabdyqtarǵa beriletin memlekettik qoldaýlarǵa ózgerister engizýi qajettigin, sondaı-aq sýarmaly jerlerge sýdyń kerekti mólsherde kelýin qamtamasyz etýin surady.
QR AShM Sý resýrstary jónindegi komıtettiń tóraǵasy Islam Ábishev sharýalar saýaldaryna jaýap berip, usynystar mınıstrlik tarapynan sheshimin tabatynyn jetkizdi. Sonymen qatar, jıynda shegirtke zııankesterimen kúresý jumystary talqylandy. Úıirli shegirtkege qarsy jumystar ońtústik óńirlerde aǵymdaǵy jyldyń 10 sáýirinen bastalǵan. Ońtústik Qazaqstan oblysynda marokko shegirtkesine qarsy kúres sharalary boıynsha josparlanǵan aýmaqtyń 1/3 bóligi óńdelgen. Óńirde bıyl úıirli shegirtkelerge qarsy zertteý jumystary 1 mln. 573 myń gektar aýmaqqa júrgizilse, hımııalyq óńdeý is-sharalary 350 myń gektarǵa jasalǵan.
QR AShM Agroónerkásip keshenindegi memlekettik ınspektsııa komıtetiniń tóraıymy Ajar Elemesqyzy shegirtkege jáne olardyń taralýyna monıtorıng júrgizýdi naqty baqylaý úshin GPS trekerler men GPS navıgatorlar qoldanylatyn aıtty. Olar respýblıka aýmaǵynyń fıtosanıtarlyq jaı-kúıin, onyń ishinde óńirlerdegi shegirtkeler boıynsha naqty kórinisin kórsetetin bolady.
