Ómirzaq Shókeev: Men eshkimge qoldan kelmeıtin tapsyrma júktemeımin
TÚRKІSTAN. QazAqparat – Túrkistan oblysynyń ákimi Ómirzaq Shókeev kómekke zárý otbasylarǵa memleket tarapynan beriletin járdemnen basqa da qoldaý kórsetýdiń tıimdi tetikterin jetildirý týraly aıtty, dep habarlaıdy QazAqparat tilshisi.
Bul máseleler oblys basshysy Ómirzaq Shókeevtiń tóraǵalyǵymen ótken májiliste qaraldy. Ákimderdiń el aldynda esep berý tártibiniń ózgergenin eske salǵan aımaq basshysy, alda ótetin mundaı jıyndarǵa eskertpeı keletinin eskertti.
«Halyqtyń shyn peıilinen shyqqan alǵystan asqan baǵa joq. Osyny umytpańyzdar. Ár isti barynsha berilip istegende ǵana nátıjege jetýge bolady. Kózboıaýshylyqqa jol joq. Men eshkimge qoldan kelmeıtin tapsyrma júktemeımin. Ótken jyldyń qorytyndysy boıynsha, barlyq salada aýyz toltyryp aıtar jetistikter bar. Biraq munymen toqtaýǵa bolmas. Aldymyzda munan da zor, munan da kóp mindetter tur»,- dedi Ómirzaq Shókeev.
Májiliste Túrkistan men Kentaý qalalaryn damytýǵa basymdylyq beriletini jáne áleýmettik sala – basty nazarda bolatyny aıtyldy. Sala basshylarynyń sózinshe, halyqty aýyz sýmen, gazben, jaryq pen sapaly jylýmen qamtamasyz etý ári qaraı jalǵasyn tappaq. Tas joldardyń tóselýi, jóndelýi, kóshelerdi jaryqtandyrý men kógaldandyrý, abattandyrý, sýlandyrý jumystary - oblys basshysynyń qatań baqylýynda.
Jıynda Túrkistan shaharyn jasyl jelekke bóleý boıynsha josparlanǵan aǵash otyrǵyzý jumystaryn naýryz aıynda tolyq bitirý júkteldi. Búginde qalada salynyp jatqan kópqabatty turǵyn úılerdiń qurylysy qarqyndy. Aldaǵy ýaqytta olardyń qatary kóbeımek. Oblys ákimi jańa baspanalardyń qoljetimdi bolýyn, úıli bolýǵa umtylǵan azamattarǵa jan – jaqty múmkindik qarastyrýdy, sondaı-aq baspana berýde barlyq sala ókilderin tolyq qamtýdy mindettedi.
Jıynda Túrkistan qalasyndaǵy áýejaı men onda barar joldyń qurylysyna qatysty sońǵy málimetter aıtyldy. 100-den astam tehnıka men 300-den astam jumysshy jumyldyrylǵan qurylys alańynda jumys qyzýda. Halyqaralyq áýejaı jyl sońynda qoldanysqa beriledi.
Túrkistannan 16 shaqyrym qashyqtyqta ornalasqan 900 gektar jerge áýejaı salýdy túrikterdiń «Yda Insaat group» kompanııasy moınyna aldy. Jańa nysan halyqaralyq standartqa saı jáne zamanaýı qurylys tehnologııasymen salynyp jatyr. Termınal jylyna 3 mln jolaýshyǵa qyzmet kórsete alady.
