Ómirzaq Shókeev memlekettik-jekeshelik áriptestik tetigin tıimdi paıdalaný týraly aıtty
TÚRKІSTAN. QazAqparat - Túrkistan oblysy ákimdiginiń jańa ǵımaratynda alǵash apparat májilisi ótti. Oblys ákimi Ómirzaq Shókeev tóraǵalyq etken májilistiń kún tártibinde óńirdegi qurylys salasy men Túrkistan qalasynyń damýy, turǵyn úı qurylysy jáne ekologııalyq máseleler qaraldy, dep habarlaıdy QazAqparat tilshisi.
Oblystyń ekonomıka jáne bıýdjettik josparlaý basqarmasynyń málimetinshe, memlekettik - jekeshelik áriptestik (MJÁ) aıasynda júzege asyp jatqan jobalar boıynsha óńir elimizde kósh bastap keledi.
Atap aıtsaq, Túrkııa kásipkerleri halyqaralyq áýejaı qurylysy men densaýlyq saqtaý salasyna tıesili keshenderdi júzege asyrmaq. Jıyn barysynda basqarma tarapynan oblysta MJÁ damytý jóninde usynystar berildi. Olar: tabıǵı gaz nysandaryn senimgerlik basqarýǵa berý, Túrkistan qalasynda turǵyn úı salý, jeke áriptes anyqtalmaǵan jobalardyń esepteýlerin qaıta qaraý, aýdandyq mańyzy bar avtomobıl joldary men ishki kóshelerdi seriktestikke senip tapsyrý, eldi - mekenderdegi sanıtarlyq-tazalaý jumystaryn servıstik qyzmetke berý.
Oblys basshysy bıýdjet shyǵyndaryn jeńildetý úshin memlekettik - jekemenshik áriptestik tetigin tıimdi ári belsendirek qoldaný qajet ekenin atap ótti. Bıznes pen bıliktiń arasyndaǵy kópirge aınalatyn tájirıbege toqtala kele, ınvestorlarǵa qolaıly usynys jasap, áleýmettik mańyzy bar salalarǵa basymdyq berý kerektigin talap etti.
Jınalysta sondaı-aq, Túrkistan qalasyn damytý men kógaldandyrý jáne abattandyrý jumystarynyń barysy talqylandy. Arys tájirıbesin negizge ala otyryp, 32 sektorǵa bólingen Túrkistan qalasyn kórkeıtý jumystary óńir basshysynyń qatań baqylaýynda ekeni belgili.
Búginde qalany kógaldandyrý, abattandyrý, ortalyq kóshelerdi kóriktendirý, kúl-qoqystan aryltyp, aýyz sý, gazben tolyq qamtamasyz etý, jaryqtandyrý jumystary qarqyndy júrýde. Apparat otyrysynda Túrkistan qalasynda júrip jatqan turǵyn úı qurylysyna qatysty sońǵy málimetter talqylandy. Jyl sońyna deıin «Nurly jer» memlekettik baǵdarlamasy aıasynda 1200 páterli 20 turǵyn úı memlekettik qyzmetkerlerge beriledi.
Onyń ishinde arendalyq 11 úıdiń qabyldaý aktisi júrgizilip, qazir úı kezeginde turǵan azamattarǵa zań talaptaryna sáıkes úılestirilýde.
Jıyn barysynda oblystaǵy qatty turmystyq qaldyqtar polıgondaryn zańdastyrý máselesi talqylandy. Bul maqsatta arnaıy komıssııa qurylyp, olardy 1 shildege deıin tolyq jóndeý júzege asyrylmaq.
