Ómirzaq Shókeev maqtashylarmen kezdesti
TÚRKІSTAN. QazAqparat - Búgin QR Premer-Mınıstriniń orynbasary- aýyl sharýashylyǵy mınıstri Ómirzaq Shókeev Túrkistan oblysyna jumys saparymen keldi. Ol Jetisaı aýdanyndaǵy sharýa qojalyqtarynyń maqta terim jumystarynyń barysymen tanysty, dep habarlaıdy QazAqparat tilshisi.
Mınıstr jumys sapary barysynda Asyqata kentindegi «Korporatsııa Aq-Altyn» JShS-niń maqta shıkizatyn óńdeý zaýytyn aralap, aýdandaǵy maqta óńdeý zaýyttary men treıderlik kompanııalar basshylarynyń qatysýymen ótken jınalysqa qatysty. Onda maqta shıkizatynyń ózekti máseleleri talqylandy. 
Aıta keteıik, atalǵan zaýyt jylyna 60 myń tonna maqta shıkizatyn qaıta óńdeýden ótkizedi. Munda qazirgi naýqan kezinde 265 adam jumys isteýde. Kásiporynda óndirilgen ónimder TMD jáne shet memleketterge jóneltiledi.
Munan soń Ómirzaq Shókeev Qaraqaı aýyldyq okrýginde ornalasqan «Ketebaı» óndiristik kooperatıviniń egistik alqabyn aralap kórdi. 1996 jyly qurylǵan kooperatıvtiń ıeleginde 800 gektar maqta alqaby bar. Mınıstr qojalyqtyń atqaryp jatqan jumystaryn qarap shyǵyp, kúzgi jıyn-terim jumystarynyń ónimdiligimen tanysty.
Munan soń Sh. Dildábekov aýyldyq okrýginde ornalasqan «Táýelsizdiktiń 20 jyldyǵy» atyndaǵy 9 shaqyrymdyq kanaldyń sý ótkizý qabiletiniń tehnıkalyq jaǵdaıyn kórdi. Sebebi, búginde atalǵan aımaqtyń sý ótkizý qabileti tómendep ketken, kúrdeli jóndeýdi qajet etedi.
Eske sala ketsek, 2011 jyly paıdalanýǵa berilgen kanaldyń qurylys jumystaryna respýblıkalyq bıýdjetten 13,523 mlrd teńge bólingen bolatyn. Ol 86,7 myń gektar egistik alqapty aǵyn sýmen qamtamasyz etýge qaýqarly.
