Ómirzaq Shókeev: Maqtaaralǵa barlyq kómek kórsetiledi
TÚRKІSTAN. QazAqparat – Túrkistan oblysynyń ákimi Ómirzaq Shókeev apattan zardap shekken aımaqqa arnaıy kelip, Arystyń tájirıbesine sáıkes Maqtaaral aýdanynda da tıisti jumystar júrgiziletinin aıtty, dep habarlaıdy QazAqparat oblystyq óńirlik kommýnıkatsııa qyzmetine silteme jasap.
Oblys ákimi Maqtaaral aýdanyndaǵy sý basqan Jańaturmys pen Jeńis eldimekenine baryp, appattan japa shekken úılerdi qarap shyqty.
Eń aldymen oblys basshysy Eńbekshi aýyldyq okrýgi Jańaturmys aýylynda boldy. Munda 47 úıde 321 turǵyn turǵan.
2 mamyr kúni túngi saǵat 01:50-de atalǵan eldimekende evakýatsııalaý is-sharalary bastaldy.
Jalpy eldi mekende 1 mektep, 1 medpýnkt, 1 meshit ornalasqan. Jańaturmys aýylynda 2 700 sıyr, 3 000 qoı, 150 jylqy, 450 taýyq bolǵan. Oblys basshysy aýdan ákimi B.Asanovqa tótenshe jaǵdaıdan zaqym kelgen áleýmettik nysan men zardap shekken mal-múlik sanyn anyqtaýdy tapsyrdy.
Budan keıin óńir basshysy Jeńis aýylyna aıaldap, aýyldyń jaǵdaıymen tanysty. Bul aýylda 280 úı, 1 922 turǵyn bar.
Eldimekende 1 mektep, 2 balabaqsha, 1 medpýnkt, 1 meshit, 1 mádenıet úıi ornalasqan. Qazirgi tańda atalǵan nysandardyń qanshalyqty zaqymdanǵany anyqtalyp jatyr. Bul aýylda qazirgi tańda jaıylym jerdiń 500 gektary, egistik alqabynyń 50 gektaryn sý basqan. Aýylda 350 sıyr, 270 qoı, 300 túıe, 70 jylqy, 700 taýyq bolǵan.
Eske sala keteıik, keshe Ózbekstanda Sardoba sý qoımasynyń bógeti jarylyp , eldi mekender, kommýnıkatsııalyq jeli, egistikke zaqym kelgen. Sonyń saldarynan Maqtaaral aýdanynyń eki aýylyn sý basty. Maqtaaral aýdanynyń ákimi, aýdandyq tótenshe jaǵdaı shtabynyń tóraǵasy Baqyt Asanovtyń tóraǵalyǵymen 2 mamyr túngi 00:00-de arnaıy jıyn ótip, tótenshe jaǵdaı jarııalandy. Sý basqan aýyldardan 5 400 adam qaýipsiz jerge kóshirildi.
