Ómirzaq Shókeev maqtaaraldyqtarmen kezdesti

TÚRKІSTAN. QazAqparat - Túrkistan oblysynyń ákimi Ómirzaq Shókeev Maqtaaral aýdanyndaǵy Jańajol aýyldyq okrýgine qarasty Órgebas jáne Fırdaýsı aýyldarynda bolyp, qalpyna keltirý jumystarymen tanysty. Úı-úıdi aralap, jergilikti turǵyndarmen júzdesti, dep habarlaıdy QazAqparat tilshisi.

«Úı turǵyzýdy úırenip aldyq. Endi biz adam jaldap, áýre bolmaımyz. Asarlatyp tam turǵyzdym. Memleketten berilgen qarajat tolyq jetip jatyr. Mynaý turǵan kórshim úsh balasymen birge úıdi bitirip qaldy. Kún jyly. El aǵalaryna, osynda júrgen ózińizge alǵystan basqa aıtarymyz joq», – dedi Órgebas aýylynyń turǵyny Quraqbaı Mamyrejepov.

Jalpy kólemi 1256 gektardy quraıtyn Órgebas eldimekeninde 209 úı ornalasqan. 194 úı tolyq buzylyp, qaıta turǵyzyldy. Aýyl turǵyndary memleket tarapynan bólingen 17 mln teńge qarajatqa úı salýda. Eldimekende aýyz sý júıeleri jańartylyp, joldar jóndelip jatyr. Sý shaıyp ketken oblystyq mańyzy bar 10 km avtojoldyń osy aýyldaǵy 4,9 shq quraıtyn 4 kóshesine aǵymdaǵy jóndeý jumystary júrgizilýde. 200 oryndyq jańa mektep salynyp, eski mektep ǵımaratynda aǵymdaǵy jóndeý jumystary júrgizildi. Sonymen birge, qosymsha mekteptiń jylytý qazandyǵy qoıylyp, feldsherlik-akýsherlik beket salynýda.

Al, Jańa jol aýyldyq okrýgine qarasty Fırdaýsı eldi mekeninde 327 úıdiń zardap shekken 308-i buzylyp, jańadan boı kóterdi. 600 oryndyq mektep jóndelip, jylytý qazandyǵyn tabıǵı gazǵa qosý jumystary júrgizilýde. Sapar barysynda Ómirzaq Estaıuly dárigerlik ambýlatorııa qurylysynda bolyp, Myrzakenttegi jańa yqsham aýdandy aralady. Jańadan salynǵan káriz júıesi stansasynyń jumysymen tanysty. Jeńis, Dostyq, Jańaturmys eldi mekenderi úshin Jańadan qurylysy josparlanǵan 70 ga jer telimin quraıtyn jańa móltek aýdanda 1200 oryndyq mektep pen bala-baqsha, dárigerlik ambýlatorııa qurylysy júrip jatyr. Myrzakent kentindegi móltek aýdanynda 398 turǵyn úı boı kóterdi.