Ómirzaq Shókeev Maqtaaraldaǵy evakýatsııalyq ortalyqtardy aralady
NUR-SULTAN. QazAqparat - Túrkistan oblysynyń ákimi Ómirzaq Shókeev Maqtaaral aýdanyndaǵy sý astynda qalǵan aýyldardyń halqymen kezdesip, olarǵa memlekettik komıssııa sheshimin jetkizdi. Ýaqytsha ashylǵan ortalyqtarda azamattardyń turmystyq jaǵdaılarymen tanysyp, muń-muqtajyn tyńdady, dep habarlaıdy Túrkistan oblysy ákiminiń baspasóz qyzmeti.
Saryaǵash aýdanynyń ákimdigine bekitilgen Igilik aýylyndaǵy orta mekteptegi evakýatsııalyq oshaqta Jańaturmys aýylynyń 200-den astam turǵyny ornalasqan. Barlyq evakýatsııalyq ortalyqtar azyq-túlik pen birinshi qajettiliktegi zattarmen tolyq qamtylǵan. Úsh mezgil ystyq tamaq beriledi. Munda medıtsına jáne polıtsııa qyzmetkerleri táýlik boıy qyzmet etedi. Aýyl turǵyndary barsha qazaqstandyqtarǵa alǵystaryn bildirip, aqsaqaldar aq batalaryn berdi.
«Sý astynda qalǵan aýyldyń árbir turǵyny 100 myń teńgeden kómek alady. Myrzakent eldi mekeninde jańa yqsham aýdan soǵylady. Ol jerge Jeńis, Jańaturmys, Dostyq aýyldary tolyqtaı kóshiriledi. Jańa qalashyqta ortalyqtandyrylǵan aýyz sý jáne gaz tartylyp, elektr jaryǵy, baılanys jelisi, joldar jasalatyn bolady. Jańa mektep, balabaqsha, ıaǵnı, áleýmettik nysandar salynady. Eń bastysy aýyzbirshiligimiz ajyramaı, bar qıyndyqty el bolyp eńserýimiz qajet»,- dedi aýyl turǵyndarymen kezdesý barysynda Ómirzaq Shókeev.
Oblys basshysy Keles aýdanyna bekitilgen Ferdoýsı aýylynyń halqymen júzdesti. «40 jyldyq» aýylynda ornalasqan orta mektepte 530 turǵyn ýaqytsha meken tapty. Sýdan zardap shekken Órgebas jáne Fırdoýsı halqyna tańdaý berildi. Olar ózge eldi mekennen boı kóteretin jańa móltekaýdanǵa kóshe alady. Memleket tarapynan óz úılerin qalpyna keltirýge ne árbir turǵyn úıin ózi salýǵa nıet bildirse, oǵan ótemaqy tólenedi. Turǵyndar sheshimdi shuǵyl túrde ózara aýylaralyq jınalysta sheshetin boldy.
Budan bólek, turǵyndar apat aımaǵynda júrgiziletin qurylysqa shaqyryldy. Qurylys jumysyna qatysýshy azamattarǵa jalaqy tólenedi. Sondaı-aq, Aýyl sharýashylyǵy taýar óndirýshileriniń shyǵyny tólenedi. Nesıesin tóleý ýaqyty keıinge shegeriledi. Al, joǵalǵan maldyń shyǵyny Tótenshe jaǵdaı boıynsha Shtab janynan qurylǵan komıssııa sheshimimen óteledi.
Oblys ákimi №5 mektep-gımnazııasyna jaıǵastyrylǵan Jeńis eldi mekeni men sý basý qaýipi joǵary Nurlyjol aýylynyń halqymen kezdesti. Ortalyqqa jaýapkershilik Shardara aýdanynyń ákimdigine bekitilgen. Maqtaaral aýdanynyń aýmaǵyndaǵy 11 evakýatsııalaý ortalyqta 2404 adam ornalastyrylǵan.
Ómirzaq Shókeev Tótenshe jaǵdaıǵa qatysty ashylǵan arnaıy qoımada boldy. Syıymdylyǵy 2000 tonnaǵa eseptelgen qoımada 232 tonnadan astam azyq-túlik qory jınalǵan. Et, un, kúrish, maı jáne kıim-keshek pen kúndelikti qoldanysqa qajetti zattar Maqtaaral aýdanyndaǵy evakýatsııalyq ortalyqtarǵa jaıǵastyrylǵan turǵyndarǵa kúndelikti taratylýda. Munda syn saǵatynda qol ushyn sozǵan óńirdiń barlyq aýdandary men ózge oblystardan gýmanıtarlyq kómekter jetkizilýde. Baqylaý «Nur Otan» partııasy Túrkistan oblystyq fılıaly basshylyǵyna júktelgen.
