Ómirzaq Shókeev Maqtaaral aýdanynda atqarylyp jatqan jumystarmen tanysty
TÚRKІSTAN. QazAqparat - Túrkistan oblysynyń ákimi Ómirzaq Shókeev Maqtaaral aýdanynda issaparmen boldy, dep habarlaıdy Túrkistan oblysy ákiminiń baspasóz qyzmeti.
Eń aldymen «Sabyr» sharýa qojalyǵynyń bir jerden eki ónim alý boıynsha atqarylyp jatqan jumystarymen tanysty. Dıqandar qystyń qaq ortasynda 12,2 gektar jerge qyryqqabat egip, erte kóktemde 305 tonna ónim alǵan. Endi dál sol jerge sharýalar qaýyn, dándik júgeri egip, taǵy da 310 tonnaǵa jýyq ónim alýdy josparlap otyr.
Odan soń aımaq basshysy KH-78 oblystyq tasjoly boıyndaǵy kópirdiń jaǵdaıyn baqylady. Sondaı-aq, «Qazsýshar» RMK, Dostyq kanalynyń ýákilderi men sý qaýymdastyqtarynyń basshylary jáne sharýalarmen kezdesti. Qazirgi tańda onda 16,4 shaqyrymǵa ortasha jóndeý jumystary júrgizilýde. Onda 6 shaqyrym resaıklerleý, 11 shaqyrym asfalt salý jumystary atqyrylǵan.
Ómirzaq Estaıuly Jetisaı aýdanyna sapary barysynda óńirdegi aýylsharýashylyq jáne jol jóndeý salasyndaǵy birqatar atqarylyp jatqan jumyspen tanysty. Eń áýeli Jetisaı qalasyna qarasty uzyndyǵy 1,68 shaqyrymdy quraıtyn S.Qojanov kóshesin orta jóndeý jumystaryn tekserdi. Atalǵan kósheniń eni 16 metrge keńeıtilip, tórt jolaqty jol bolyp salynady. Sondaı-aq, kóshege jaryqtandyrý baǵanalary men jıekteme tastar ornatý jumystary júrgiziledi.
Oblys basshysynyń nazarynan uzyndyǵy 19,9 shaqyrymdy quraıtyn oblystyq mańyzy bar «KH-86 «Jetisaı-Maqtaly» avtomobıl jolyn orta jóndeýden ótkizý jumystary da tys qalǵan joq. Nysannyń jóndeý jumystary 2021 jylǵa ótpeli.
Keıin oblys basshysy «Kamıljon» sharýa qojalyǵyna aıaldady. Yntymaq aýylynda ornalasqan kásiporyn 1996 jyly qurylǵan. Qazirgi tańda 71 gektar aýmaqty alyp jatqan sharýaqojalyǵynda 10 adam turaqty túrde jumys isteıdi. 2020 jyly egilgen aýyl sharýashylyǵy daqyldary maqta, bolgar buryshy, qyryqqabat. Ekinshi ónimge qaýyn, qarbyz, mash jáne kúzdik qyryqqabat daqylyn egýdi kózdep otyr.
Jumys saparynyń sońynda oblys ákimi Ómirzaq Shókeev Jetisaı aýdanynyń Sh.Dildábekov aýyldyq okrýginde ornalasqan Táýelsizdiktiń 20 jyldyǵy atyndaǵy mashınalyq kanalǵa bardy. Kanalǵa 13, 523 mlrd teńge jumsalyp, 2011 jyly salynǵan bolatyn. Kanal 86,7 myń gektar egistik alqapty aǵyn sýmen qamtamasyz etýge qaýqarly.
Aımaq basshysy sharýalarmen kezdesip, jalpy sharýalardyń sýsyz qalmaý kerektigin eskertti. Jergilikti sharýalarǵa mashınalyq ádispen sýarýdyń úlesi zor ekendigin jetkizdi.
