Ómirzaq Shókeev qurylysshylarmen kezdesti
TÚRKІSTAN. QazAqparat – Túrkistan oblysynyń ákimi Ómirzaq Shókeev qurylys alańdaryn aralap, memlekettik-jekemenshik áriptestik aıasynda «Sembol construction» túrik kompanııasy qolǵa alǵan «Kerýen-saraı» kópfýnktsıonaldy týrıstik keshen qurylysshylarymen kezdesti, dep habarlaıdy QazAqparat tilshisi.
Ómirzaq Shókeev Túrkistannyń damýyna úles qosqan qurylysshylar eńbeginiń eleýli ekenine toqtaldy.
«Túrkistan qalasynda iri jobany júzege asyryp, shahardyń damýyna úlken úles qosyp jatqan sizderdiń eńbekterińiz eleýli. Bul jumystardyń aýqymy keń, óte kúrdeli. Belgilengen kestege sáıkes júrip jatqanyn kórip turmyn. Ol úshin sizderge aıtar alǵysym erekshe. Jumys barysynda qandaı da bir máseleler týyndap jatsa, biz ózderińizge kómek qolyn sozýǵa árqashanda daıynbyz»,-dedi oblys ákimi.
Quny 39 mlrd teńge turatyn álemde teńdesi joq halyqaralyq deńgeıdegi týrıstik keshende zamanaýı qonaq úıler, shyǵys bazary, meıramhanalar iske qosylyp, jasandy kól paıda bolady. Qurylystyń jalpy aýmaǵy 200 myń sharshy metrden asady. Tereń tarıhymen tanymal Túrkistannyń basty baılyǵy Q. A. ıAsaýı kesenesiniń mańynda boı kóterip jatqan biregeı jobada kóne shahardyń kórinisi saqtalǵan. Qurylys jumystary aldaǵy qazan aıynda aıaqtalady dep kútilýde.
