Ómirzaq Shókeev qostanaılyq sharýalarǵa agrarlyq qolhattyń mańyzyn túsindirdi
Ómirzaq Shókeev jergilikti aýylsharýashylyq taýar óndirýshilerimen kezdesip, agroóndiris kesheniniń aımaqtaǵy damý baǵyttaryn talqylady. Mınıstr sharýalardyń problemasyn tyńdap, ashyq áńgime ótkizdi. Qostanaılyq agrarshylardy mazalaıtyn bir másele - qaǵazbastylyq. Egin naýqany kezinde dıqandardyń kóbi astyǵyn kesh ótkizedi. Oǵan doda-doda qaǵaz qujattardyń kóptigi sebep. Al mınıstr óz kezeginde elektrondy agrarlyq qolhatqa kóshýdiń mańyzyna toqtaldy.
«Qazirgi ýaqytta elevatorlarda kóp qoldanylatyn astyq qolhattary tıimsiz qural retinde qalyp bara jatyr. Moıyndaý kerek, kezinde elevatorlar bos qoltańbany kóptep bere bergen. Ol qaǵaz qujattardy keıin taba almaı jatady. Endi astyqqa qatysty eseptiń bárin elektrondy formatqa aýystyrý kerek. Elektrondy qolhat biraz sharýany jeńildetedi. Ekinshiden, bankterden nesıe alý sharýalar úshin paıdasyz. Onyń paıyzdyq ústemesi de joǵary. Sondyqtan, qarapaıym fermerlerge memlekettiń jan-jaqty qoldaýy týraly túsindirý qajet. Bul jumystardy jergilikti ákimder óz jaýapkershiligine alsyn», - dedi Ómirzaq Shókeev.
Jıynda aıtylǵandaı, sońǵy jyly bankterdiń agroónerkásip keshenderin nesıelendirýi 25 paıyzǵa tómendegen, al paıyzdyq ústemeaqy 18 paıyzǵa jetken. Mınıstr AÓK-de nesıeler ústemeaqysy 10 paıyzdan joǵary bolmaýy kerektigin atap ótti.
QR Aýyl sharýashylyǵy mınıstrligi aldaǵy jyldary eldegi otbasylyq fermalar men jaıylym jerdi, iri qara men qoı sanyn arttyrýdy kózdep otyr.
Derekterge súıensek, Búgingi kúni Qazaqstanda 20 myńnan astam fermerlik sharýashylyq bar. Olardyń barlyǵy - «Sybaǵa» baǵdarlamasynyń qatysýshylary. Jaqynda mınıstrlikte bul kórsetkishti 100 myńǵa deıin jetkizý máselesi kóterildi.
«Shamamen alǵanda, aldaǵy 10 jylda 80 myńnan astam otbasylyq ferma quryp, qoı sanyn 30 mln-ǵa deıin ósirýdi josparlap otyrmyz. Biz osy kórsetkishke jetý úshin arnaıy jobalar usyndyq. Onyń aıasynda aýyl sharýashylyǵymen aınalysatyndar úshin birshama jeńildikter qarastyrylǵan. Taǵy bir másele, aýdan ákimderi aýyl sharýashylyǵyna jany ashıtyn kásipkerlerdi ózderi izdep tabýy kerek. Óıtkeni, memlekettik sýbsıdııany tamyr-tanystyqpen alyp jatqandar bar. Sondyqtan, bul sharýany ákimder myqtap qolǵa alsyn. Nátıje jaqsy bolsa, sýbsıdııaǵa qoly jetken sharýashylyqty damytyp, ár aýyldan bir otbasylyq ferma qurýǵa bolady», - dedi mınıstr.
Agrokeńes pikir almasý jáne óńirdiń taýar óndirýshileriniń mańyzdy máselelerin talqylaý formatynda jalǵasyn tapty. Sharýalar otandyq tehnıkalardy sýbsıdııalaý, egin sharýashylyǵyndaǵy kedergiler, janar-jaǵarmaı quny sııaqty birneshe mańyzdy máselelerdi ortaǵa saldy. Ómirzaq Shókeev qostanaılyq agrarshylardyń suraqtary QR Aýyl sharýashylyǵy mınıstrliginiń jınalystarynda qaralatynyn aıtty.
Buǵan deıin habarlaǵanymyzdaı, búgin QR vıtse-premeri, aýyl sharýashylyǵy mınıstri Ómirzaq Shókeev Qostanaı oblysyna is-saparmen keldi.
Ol sapar barysynda Qostanaı qalasyndaǵy ındýstrııalyq aımaqtyń jumysymen tanysty.