Ómirzaq Shókeev: Qostanaılyq fermerlerge barynsha jeńildikter jasaımyz
QOSTANAI. QazAqparat - Ómirzaq Shókeev Qostanaıdaǵy jumys sapary barysynda ındýstrııalyq aımaqtyń jumysymen tanysty, dep habarlaıdy QazAqparat.
Qostanaı oblysy ákiminiń orynbasary Meıirjan Myrzalıev QR vıtse-premeri, aýyl sharýashylyǵy mınıstri Ómirzaq Shókeevke ındýstrııalyq aımaqtaǵy qurylysy bastalyp jatqan zaýyttar týraly baıandady.
"Indýstrııalyq aımaqqa sheteldik ınvestorlar qyzyǵýshylyq tanytyp otyr. Jaqynda ǵana teledıdar zaýytyn salatyn qytaılyq kásipkerler úshin sý qubyry men gaz jelisin tarttyq. Biz olardyń talaptaryn tolyqtaı oryndadyq. Jalpy búginde ındýstrııalyq aımaqta qurylysqa 400 gektar jer qarastyrylǵan. Bolashaqta ony 800 gektarǵa deıin ulǵaıtý josparlanǵan",-dedi M.Myrzalıev.
Qostanaı oblysynda aýyl sharýashylyq tehnıkalarynyń klasterin qurý josparlanǵan. Máselen, osy jyly óńirde "Belarýs" traktoryn qurastyrý jumysy qolǵa alynbaq. Muny reseılik "Kompozıt grýpp" kompanııasy Mınsk traktor zaýytymen yntymaqtastyqta iske asyrady. Jospar boıynsha munda jylyna 3 myńǵa deıin traktor shyǵarylady. Mınıstr óńirdiń aýyl sharýashylyǵyndaǵy ınvestıtsııalyq jobalardyń iske asý barysyn únemi baqylap otyrýdy tapsyrdy. 
"Indýstrııalyq aımaqtyń áleýeti joǵary ekeni sózsiz. Endi traktor qurastyrý jumysyn qadaǵalap otyrý qajet. Mundaǵy otandyq úles 50%-dan kem bolmaýy tıis. Jergilikti fermerlerge barynsha jeńildik qarastyrylady. Óz jerimizde shyǵarylǵan traktorlardy 52%-ǵa deıin sýbsıdıalaýymyz múmkin. Onyń 25%-yn mınıstrlik, 10%-yn jergilikti bılik qarastyrady", - dedi Ómirzaq Shókeev.
Qazirgi ýaqytta ındýstrııalyq aımaqta 12 ınvestjobany iske asyrý kózdelgen. Jobalardyń jalpy quny - 1 trln teńgege shaqtalǵan.
Búgin Ómirzaq Shókeev jergilikti aýylsharýashylyq taýar óndirýshilerimen kezdesý barysynda agroóndiris kesheniniń aımaqtaǵy damý baǵyttaryn talqylamaq.
