Ómirzaq Shókeev kóshet otyrǵyzý naýqanyn bastap berdi
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistan mańynda qalyptasqan «Jasyl beldeý» aýmaǵyn aralap, qysta egilgen aǵashtardy qarap shyqty. Sondaı-aq orman alqabynda birneshe kóshet egip, kóktemgi ekologııalyq naýqandy bastap berdi, dep habarlaıdy QazAqparat.
Qala mańyna egilgen jasyl jelektiń aýmaǵy 8 myń gektarǵa jýyq alqapty alyp jatyr. Aldaǵy ýakytta onyń kólemin eki ese arttyrý kózdelgen.
Túrkistannyń aınalasynda qazirde 1 mıllıonnan artyq japyraqty, kópjyldyq aǵash kóshetteri jaıqalyp ósip tur. Bıyl da óńirde shaǵan, terek, qaıyń, qaraǵash, arsha, úıeńki aǵashtary otyrǵyzylady.
Jalpy «Jasyl beldeý» josparynyń jartysyna jýyǵy oryndalǵan. Túrkistan tóńireginde aǵash otyrǵyzyp, sý júıelerin tartý jumystary naýryz aıynda tolyq aıaqtalmaq. Qazirde uńǵymalar qazylyp, kóshet otyrǵyzylǵan jerler qorshalýda. Qalanyń ishi men aınalasyn kógaldandyrý jańarǵan shahardyń qurylysyndaǵy mańyzdy máselelerdiń biri. Kúrt qubylmaly klımatty ózgertý úshin jazyq dalada qoldan orman jasaý jobasyn júzege asyrǵan Ómirzaq Shókeev jasyl alqapty aralap, aýqymdy jumys barysyna kóńili toldy.
«Jasyl alqap Túrkistannyń tabıǵı tynysyna aınalmaq. Sonyń arqasynda aýa tazaryp, qala shań men jeldi daýyldan qorǵalady. Sonymen birge, qala turǵyndarynyń súıikti demalys ornyna aınalmaq. Óıtkeni jasyl beldeý aýmaǵynda sý arnalary men jasandy kól paıda bolady. Túrli jan-janýar men men san alýan qustar mekendeıdi», - dedi oblys ákimi.
«Jasyl beldeýdegi» tálimbaqta Túrkistan qalasynyń klımatyna tez beıimdeletin, tek ózge memleketterde ósetin ósimdikterdi jersindirý boıynsha tájirıbeler jasaldy. Bul óz kezeginde keıbir qylqanjapyraqty tuqymdas túrlerin Túrkistan qalasynyń aınalasyndaǵy «Jasyl beldeýde» ósirý úshin beıimdeý maqsatynda júzege aspaq.
