Ómirzaq Shókeev koronavırýstyń ekinshi tolqynyna daıyndyq týraly aıtyp berdi

TÚRKІSTAN. QazAqparat – Túrkistan oblysynda koronavırýs ınfektsııasynyń ekinshi tolqynyna daıyndyq aıasynda medıtsınalyq uıymdardy dárilik zattarmen jáne qorǵanysh quraldarymen qamtamasyz etýge 2,1 mlrd teńge bólindi. Bul týraly oblys ákimi Ómirzaq Shókeev QR Prezıdenti janyndaǵy Ortalyq kommýnıkatsııalar qyzmeti uıymdastyrǵan brıfıngide málim etti, dep habarlaıdy QazAqparat tilshisi.

Ómirzaq Shókeevtiń aıtýynsha, oblys aýmaǵynda 557 bólshek saýda dárihanalarynyń qyzmet atqaratyn 238-imen ózara árekettesý týraly memorandýmǵa qol qoıylǵan. PTR-zerthanalarynyń sany 3-ten 9-ǵa deıin artty. Sonymen qatar, 12 jyljymaly medıtsınalyq keshen jıyntyǵy satyp alynyp, nátıjesinde jyljymaly medıtsınalyq keshenmen aýdandardy qamtamasyz etý kórsetkishi 100% quraǵan. Jedel-járdem qyzmetine 122 avtokólik satyp alý josparlanýda. Bul avtokólikter jedel-járdem qyzmeti parkin 96,0% jańartýǵa múmkindik beredi.

«Túrkistan oblysynda indet órshigeli COVID-19 indetin juqtyrǵan 3 430 adam tirkeldi. Olardyń 3 360-y dertinen aıyqty. Qaıtys bolǵandar – 46. Sonymen qatar, 1 tamyzdan bastap pnevmonııaǵa shaldyqqandar sany 812-ge jetti. Medıtsına uıymdaryn dárilik zattar men arnaıy qorǵanysh quraldarymen qamtamasyz etý maqsatynda respýblıkalyq bıýdjetten 1,4 mlrd teńge, oblystyq bıýdjetten 0,8 mlrd teńge qarjy qarastyryldy. Atalǵan qarajatqa 361,8 mln teńgege dárilik zattar, 1,6 mlrd teńgege medıtsınalyq buıymdar, 185 mln teńgege dezınfektsııalyq eritindiler satyp alyndy», - dedi aımaq basshysy.

Oblys ákiminiń sózinshe, satyp alynǵan quraldardyń 70% ár medıtsınalyq mekemelerde, qalǵan 30% oblystyq qoǵamdyq densaýlyq basqarmasynyń qoımasynda qor retinde saqtalǵan. Eki aılyq qor rezervi qalyptastyryldy. Budan bólek, Ózbekstan, BAÁ, Qytaı, Reseı jáne taǵy basqa memleketterden gýmanıtarlyq kómek retinde kelgen dárilik zattar men jeke qorǵanysh quraldary medıtsınalyq uıymdarǵa taratyldy.

«Óńirde turǵyndardyń dárilik zattar men medıtsınalyq buıymdarǵa qoljetimdiligin qamtamasyz etý maqsatynda jergilikti turaqtandyrý qory quryldy. Jalpy oblys aýmaǵynda 557 bólshek saýda dárihanalarynyń qyzmet atqaratyn 238-men ózara árekettesý týraly memorandýmǵa qol qoıyldy. Oblysta medıtsınalyq uıymdardyń materıaldyq-tehnıkalyq bazasy kelesi baǵyttar boıynsha jasaqtaldy. Ókpeni jasandy jeldetý (ÓJJ) apparattarynyń sany 178-den 337-ge deıin artty, ósim 47,1%. Ottegi stantsııasynyń sany 2 esege artyp, qosymsha 4 stantsııa ornatyldy (8 stantsııa). Sondaı-aq, 80 birlik oksıgenatsııa apparaty (HI-FLOW) satyp alyndy. Budan bólek, ottegi kontsentratorlarynyń sany 890 birlikke jetip, ósim 95,0% qurady. Oǵan qosa ottegi núkteleriniń sany 9,7 esege artyp, 205-ten 2095 núktege deıin ulǵaıdy», - dedi Ómirzaq Shókeev.

Óńir basshysy sondaı-aq, oblystyq bıýdjet esebinen 1 dana kompıýterlik tomograf pen 3 dana sandyq rentgen apparattary ornatylǵanyn atap ótti. Medıtsınalyq uıymdarda pýlsoksımetrdiń qamtamasyz etilýi 190-nan 4 069-ǵa deıin jetip, 95,3% artqan. PTR zerthanalarynyń sany 3 birlikten 9 birlikke deıin ósken. Jedel járdem qyzmeti parkin 96,0% jańartýǵa múmkindik bergen. Búgingi kúnge 56 sanıtarlyq avtokólik jetkizilgen. Qalǵan 21 dana 20 qarashaǵa deıin, 45 dana 31 jeltoqsanǵa deıin jetkiziletin bolady dep josparlanyp otyr.