Ómirzaq Shókeev: Kentaý Túrkistan qalasymen qatar damıdy
NUR-SULTAN. QazAqparat - Kentaý qalasy ákiminiń eseptik kezdesýine qatysqan oblys ákimi Ómirzaq Shókeev oblys ortalyǵy Túrkistanmen birge Kentaý qalasy da qatar damıtyndyǵyn atap ótti, dep habarlaıdy oblystyq ákimdiktiń baspasóz qyzmeti.
«Ákimderdiń el aldynda esep berýi kezinde Elbasy Nursultan Nazarbaevtyń Jarlyǵymen engizilip, qalyptasqan dástúrge aınaldy. Memleket basshysy Qasym-Jomart Toqaev bul dástúrge úlken mańyz berip, jańasha ótkizý úshin ózgerister engizdi. Ózderińiz kórip júrgendeı, jańashyldyq qarqyny jaqsy. Búgingi kezdesý sonyń bir dáleli. Kentaý 65 jyldyq tarıhy bar qala. Kezinde óndiris órkendegen óńir bolǵan shahar eldegi daǵdarys saldarynan birshama qıyndyqtardy bastan ótkerdi. Qazir jaǵdaı turaqtanyp, Kentaýdyń jańa dáýiri bastaldy. Qala ákimine úlken jaýapkershilik artyp, senim bildirip otyrmyz. Ózine júktelgen mindetterdi júzege asyrýda josparlary bar. Ásirese, áleýmettik salaǵa basty baǵyt berýi kerek. Sondaı-aq, Kentaýda aýyl sharýashylyǵy jaqsy damyp keledi. Shet eldiń tájirıbesine súıenip, bul salada da kóptegen jumystar atqarýǵa bolady», – dedi Ómirzaq Estaıuly.
Shahar basshysy Dáýren Mahajanov áleýmettik-ekonomıkalyq damýy aıasynda atqarylǵan jumystardy baıandady.
«Byltyr qala bıýdjeti kiris bóligin 40 mlrd. teńgege oryndadyq. Mundaı kórsetkish qala tarıhynda buryn sońdy bolǵan emes. Qala ekonomıkasyna tartylǵan ınvestıtsııa kólemi 24,4 mlrd. teńgege jetken. Indýstrıaldy aımaqta 2,9 mlrd. teńgege 10 jobany iske iske qosý josparlanǵan. Aýyl sharýashylyǵy salasyndaǵy basty baǵyt – azyq-túlik beldeýin quryp, jylyna 3 ret ónim jınaýdy júzege asyrý. Bul salaǵa ınvestıtsııa men ozyq tehnologııalardy tartý. Osyǵan oraı aýyl sharýashylyǵy kooperatıvterine biriktirý jumystaryn jasaýdamyz», – dedi qala basshysy óz baıandamasynda.
Kentaý qalasyn tabıǵı gazben qamtamasyz etý jumystary qarqyndy júrýde. Tozyǵy jetken 300 kópqabatty turǵyn úıdi tolyq jóndeýden ótkizip, jańartý kózdelgen. Joldar jóndelip, kósheler tolyq jaryqtandyrylýda. Eki kópqabatty turǵyn úı paıdalanýǵa berilip, 10 úıdiń qurylysy júrip jatyr. Aldaǵy ýaqytta munda tennıs korty, basketbol, voleıbol, fýtbol alańshalary ornalasyp, velojol salynbaq. Kentaýda aýysymyna 500 kelýshini qabyldaıtyn jańa emhana boı kóterdi. Munda emhana men «Jedel járdem» stansasy ornalasatyn bolady.
Kezdesýde turǵyndardyń suraqtaryna qala ákimi keń kólemde jaýap berdi. Jıyndy qorytyndylaǵan Ómirzaq Estaıuly kópshilikti ıgi isterdiń júzege asýyna qoldaý kórsetýge shaqyrdy.
Eseptik kezdesýden soń oblys ákimi jańadan salynyp jatqan úılerdiń qurylysy men qalanyń jylý júıesine engizilgen jańa jobamen tanysty. Alda Kentaý qalasy tolyq avtonomdyq jylý júıesine kóshedi. Turǵyndar tarapynan qoldaýǵa ıe bolǵan bastamaǵa oblys ákimi oń baǵasyn berdi.
