Ómirzaq Shókeev Qazyǵurt aýdanyndaǵy egistik alqaptaryn aralap kórdi
TÚRKІSTAN. QazAqparat - Túrkistan oblysynyń ákimi Ómirzaq Shókeev aýdandyq ardagerler keńesteriniń tóraǵalarymen jáne máslıhat depýtattarymen birge Qazyǵurt aýdanynda egistik alqaptardy aralap, astyq orý naýqanynyń barysyn baqylady, dep habarlaıdy QazAqparat.
Oblys ákiminiń baspasóz qyzmetinen málim etkendeı, Ó.Shókeev sapar barysynda aldymen Q. Ábdalıev aýyl okrýgindegi «Tileýberdi» sharýa qojalyǵynda bolyp, alqapta jaıqalǵan eginge oń baǵasyn berdi. Jıyrma jyldan astam ýaqyt boıy egin sharýashylyǵymen aınalysyp kele jatqan sharýa qojalyǵynyń 1500 gektar jerge jýyq alqabynda bıdaı, arpa, maqsary men jońyshqa egilgen. 7 dana astyq orý kombaıny men 15 sharýa tynymsyz eńbektenýde. Byltyr astyqtyń ár gektarynan 20 tsentner egin alynǵan bolsa, bıyl odan joǵary ónim alý josparlanyp otyr.
«Bıyl jaýyn-shashyn kóp jaýyp, mol egin jınaýǵa qolaıly jaǵdaı boldy. Aýdanda jumys qarqynynyń ilgeriligi de baıqalady. Astyq qorynyń mol bolýy asa mańyzdy. Halyqty óz ónimimizben qamtamasyz etýimiz qajet. Sol sebepti aıanbaı eńbek etińizder. Aýdanda aýyl sharýashylyǵyn qarkyndy damytýǵa barynsha qoldaý kórsetiledi», – dedi aımaq basshysy.
Oblys basshysy budan soń Qyzylqııa eldi mekeninde úı irgesinen jeke qosalqy sharýashylyǵyn dóńgeletken sharýa qojalyǵynyń jumysymen tanysty. Dıqandar tamshylatyp sýarý júıesin tıimdi paıdalana otyryp, tátti burysh ósirýmen aınalysady. Jyldyq ónimi 40 tonnany quraıdy. Qojalyq egesi jobaǵa 5 mln. teńge qarjy quıǵan. Eńbekqor dıqan qosymsha aýyl turǵyndaryn jumyspen qamtýda. Jalpy, Qazyǵurt aýdanynda sharýalar 44 myń 221 gektarǵa egin ekken.
