Ómirzaq Shókeev Qazyǵurt aýdanynda dıhandarmen kezdesti
TÚRKІSTAN. QazAqparat – Túrkistan oblysynyń ákimi Ómirzaq Shókeev jumys saparymen Qazyǵurt aýdanynda boldy, dep habarlaıdy QazAqparat oblys ákiminiń baspasóz qyzmetine silteme jasap.
Aımaq basshysy Ómirzaq Shókeev aldymen Qazyǵurt aýdanyndaǵy Dinmuhammed Qonaev kóshesiniń boıyndaǵy abattandyrý jumystarymen tanysty. «Aýyl – el besigi» arnaıy baǵdarlamasy aıasynda «Memlekettik rámizder» jáne «Rýhanı jańǵyrý» alleıalarynyń qurylysy eki aı ishinde tolyǵymen aıaqtalyp, el ıgiligine tapsyrylǵan.
Munan soń Túrkistan oblysynyń ákimi jóndeýden ótken ortalyq stadıonda boldy. Osydan jarty ǵasyr buryn salynǵan sport alańy osy ýaqyt ishinde alǵash ret kúrdeli jóndeýden ótken. Qazir jańa tynys bitip, jasóspirimderdi qabyldaýǵa daıyn. Stadıonda 28 balalar toby sportpen aınalysady.
Kelesi nysan - Qyzylqııa aýylyndaǵy «Amangeldi» sharýa qojalyǵy. Dıqandar tamshylatyp sýarý ádisin qoldanyp, baý-baqsha baptaý kásibimen aınalysady. Joǵary surypty alma, shabdaly, shıe, alhor, órik jáne almurt, júzim ósiredi. Sharýa qojalyq qoımasynda 2 myń tonna jemis-jıdek saqtaýǵa bolady.
Aımaq basshysy Sharbulaq aýylyna qarasty «Sapa-2002» JShS aralap kórdi. Qojalyq egin egip, mal bordaqylaý kásibimen aınalysady. 10 myń bas ýaq mal bordaqylaý kesheninen jarty jylda 150 myń tonnadan astam et eksporttalǵan.
«Mal sharýashylyǵyn damytý úshin birinshi kezekte veterınarııa salasyn damytý kerek. Bul máseleni durys jolǵa qoıa almasaq, et eksporty týraly aıtý da ábestik. Bizde et ónimderiniń, onyń ishinde sıyr eti men qoı etiniń syrtqy saýdadaǵy potentsıaly óte joǵary. Degenmen, aldymen ishki naryqty qamtamasyz etý jaǵyn alǵa qoıý kerek», - dedi Ómirzaq Shókeev sharýalarmen kezdesýde.
Sharýalar Qazyǵurt qymyzyna suranystyń óskenin aıtyp ótti. Sondaı – aq tańqýraı ósirýdi kásip etken jergilikti dıqandar jylyna 2-3 ónim alý ádisin myqtap qolǵa alǵan.
Aýdanda ósimdik maıyn óndirý tsehy daıyn ónim shyǵarady. Óndiris qýattylyǵy jylyna 1000 tonna ónimdi quraıtyn tseh Qytaı Halyq Respýblıkasyna maqsary maıyn eksporttaıdy. Kásiporyn maqta maıyn da óndiredi.
