Ómirzaq Shókeev Qajymuqanǵa memorıaldyq keshen qashan salynatynyn aıtty
«Qajymuqan Muńaıt pasuly bizdiń ataqty jerlesimiz. Keler jyly mereıtoıy ótedi. Soǵan baılanysty jurtshylyqtyń usynysymen Ordabasy aýdanynda Qajymuqan atamyzdyń úlken memorıaldy keshenin salý qajet degen bastama kóterildi. Oǵan arnaıy qarjy bólip, tıisti qujattaryn daıyndadyq. Qazir smetalyq-jobalaý qujaty daıyn. Tıisti mınıstrlik arqyly Úkimetke usyndyq. Ol jerde qarjy máselesi sheshiletin bolsa, onda kelesi jyly keshen qurylysyn bastaımyz», - dedi Ómirzaq Shókeev Ortalyq kommýnıkatsııalar qyzmeti alańynda ótken baspasóz máslıhatynda.
Aıta keteıik, 2021 jyly qazaqtyń belgili palýany Qajymuqan Muńaıtpasulynyń 150 jyldyq mereıtoıy ótedi. Soǵan oraı Túrkistan oblysy, Ordabasy aýdanynda Qajymuqanǵa memorıaldyq keshen salynatyn bolyp josparlanǵan. Zamanaýı úlgide boı kóteretin nysannyń qurylys jumystary osy jyldyń qarasha aıynda bastalyp, 2021 jyldyń qazan aıynda aıaqtalýy tıis edi. Alaıda, taıaýda senator Álimjan Qurtaev QR Premer-Mınıstri Asqar Mamınge depýtattyq saýal joldap, onda Q. Muńaıtpasulynyń memorıaldyq keshenin salýǵa respýblıkalyq bıýdjetten qarjy bólinbeı otyrǵanyn aıtqan bolatyn.
