Ómirzaq Shókeev kásipkerlerge kepildiksiz nesıe alýdyń jolyn kórsetti
TÚRKІSTAN. QazAqparat - Nesıe alýda kepildiktiń bolmaýy kóp kásipkerlerge, ásirese shaǵyn bıznes ıelerine qolbaılaý bolýda.
Túrkistan oblysynyń ákimi Ómirzaq Shókeev óńirdiń shaǵyn bıznes ıeleri men jas kásipkerlermen tanysyp, kókeıinde júrgen máselelerdi birlese talqylady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Baspasóz qyzmetiniń málámtterine qaraǵanda, ortaǵa salynǵan máselelerdiń basym bóligi qoljetimdi nesıelerdi alý aıasynda boldy. Qańtarda ótken Úkimettiń keńeıtilgen otyrysynda Prezıdent Qasym-Jomart Toqaev «shaǵyn jáne orta bızneske qoldaý kórsetý eń basty nazarda bolýǵa tıis» ekendigin atap ótti. Sondaı-aq Memleket basshysy shaǵyn nesıelerdiń kólemin ulǵaıtyp, halyqqa beriletin shaǵyn nesıelerdiń mólsherin 6 paıyzdan asyrmaýdy tapsyrdy.
Shaǵyn bıznesti qoldaý maqsatynda «Bıznestiń jol kartasy 2025» baǵdarlamasyna jańa qural iske qosylyp, tyǵyryqtan shyǵar jol tabyldy. 5 mln. teńgege deıin eki jylǵa kepildiksiz nesıege ıe bolý úshin nebári jarty saǵat ýaqyt ketedi. Ol úshin jeke kýálik pen kásipkerlik qujattyń bolýy jetkilikti.
«Búgingi kezdesýimizdiń basty sebebi, osy jaǵymdy jańalyqty ózderińizben bólisip, júzege asyrylý tetigin naqty is júzinde kórsetý bolyp otyr. Shaǵyn onyń ishinde mıkrokásipkerlik sýbektileri aınalym qarajatyn tolyqtyrý úshin 5 mln. teńgege deıin 6 paıyzdyq nesıeni eshqandaı kepildiksiz alýǵa múmkindigi bar. Bul qarjy quraly az ýaqyt ishinde bıznes úshin pármendi qoldaýǵa aınaldy. Osy múmkindikti paıdalana otyryp, kásipkerlerge qulaqqaǵys jasaǵym keledi. Qurmetti kásipkerler! Bıznes úshin jasalyp jatqan qoldaýlardyń aýqymy Tuńǵysh Prezıdent – Elbasy N.Á.Nazarbaevtyń, Memleket basshysy Q.K.Toqaevtyń kásipkerlerdi qoldaý saıasatynyń aıqyn dáleli. Memlekettik qoldaý sharalaryn barsha túrkistandyqtarǵa jetkizip, árbir kásipkerdi qoldaýdan tys qaldyrmaý – basty mindet. Sondyqtan da, barlyq kásipkerlerdi osy is-sharalarǵa belsendi qatysýǵa shaqyramyn»,- dedi oblys ákimi Ómirzaq Shókeev.
Túrkistan oblysy boıynsha nesıeler Halyq Banki, Bank TsentrKredıt, Sberbank arqyly usynylýda. Nebári sońǵy bir aıdyń ishinde 200-den astam nesıe maquldanyp, 62 kásipker qarjylandyryldy.
Aıta ketý kerek, memlekettik qoldaý sharalarynyń kásipkerler úshin qoljetimdiligin arttyrý, óńirdegi bıznes ahýaldy jaqsartý ákimdik jumysynyń basty baǵytynyń biri. Esepti jylda «Qarapaıym zattar ekonomıkasy», «Bıznestiń jol kartasy 2025» baǵdarlamalary arqyly kásipkerler 50,7 mlrd. teńgege jeńildetilgen 6%-dyq nesıemen qamtamasyz etildi. Ótken jyly órshigen epıdemııalyq ahýalǵa qaramastan Túrkistan kásipkerleri belsendilik tanytyp, nesıelerdiń kólemi 1,3 ese artty.
Oblys aýmaǵynda 140 605 shaǵyn jáne orta kásiporyn jumys istep tur. Sońǵy 2,5 jylda olardyń sany 14 myńǵa ósken. Bul salada 200 myńnan astam adam jumyspen qamtylǵan. Pandemııaǵa qaramastan shaǵyn jáne orta kásipkerliktiń ónim kólemi 16%-ǵa artyp (ósim boıynsha Respýblıkada 2 oryn), 554,4 mlrd. teńgege (9 aı) jetti. 2021 jylda 1 trln. teńgege jetkizý josparlanýda.
