Ómirzaq Shókeev karantın sharalarynyń qatań saqtalýyn qamtamasyz etýdi tapsyrdy

TÚRKІSTAN. QazAqparat – Túrkistan oblysynyń ákimi Ómirzaq Shókeev óńirde karantın kezindegi sanıtarlyq talaptardyń qatań saqtalýyn tekserip, Túrkistan qalasyndaǵy birqatar nysandardy aralady, dep habarlaıdy QazAqparat tilshisi.

Aımaq basshysy jaýapty sala basshylaryna COVID-19 ınfektsııasynyń taralýyna jol bermeý maqsatynda karantın sharalaryn qatań saqtaýdy qamtamasyz etýdi tapsyrdy.

Óńir basshysy oblys ortalyǵyndaǵy qurylys jumystary barysyn tekserip, kúsheıtilgen sanıtarııalyq-dezınfektsııalyq rejımdi saqtaı otyryp jumys isteýdi talap etti. Karantın shekteýlerine sáıkes, oblys aýmaǵynda betperde kııý tártibi saqtalady.

Aıta keteıik, aımaqta qonaq úıler men sanatorıılerdi qospaǵanda týrızm nysandary men basseınder, jaǵajaılar, akvaparkterdiń qyzmetine tyıym salynǵan. Sondaı-aq, monsha jáne saýnalardyń da jumysy toqtatylǵan.

Mádenıet nysandary men murajaılar jabylyp, balabaqshalar jumys istemeıdi.

Sonymen qatar, jabyq bazarlar, avtomobıl men kıim-keshek satatyn, mal bazarlary men adam kóp jınalatyn basqa da nysandardyń jumysy toqtaǵan.